Nagaland ekta state ase juntu culture, identity aru resilience te rich ase, kintu dangor dukh ekta hoise—state lamba rasta para ahi tak, bishi kotha khan promise to kora hoise, kintu kaam to kori dia nai. Etu promise khan political, developmental aru economic hisap te kora thakile bhi, enika lagise ke maximum to khali election te vote pabole kora thakise. Etu sob khali Nagaland laga development delay kora nahoi, bishi manu laga bishwas bhi kom kori dise, especially youth khan majot. Sobse dangor aru old promise to hoise Naga political issue resolve koribole. India government aru Naga political group khan majot peace talks decade para chuli ase. Kunba agreement sign hoise, framework announce kora hoise, deadline fix kora hoise—kintu final solution to aji tak bhi nai. Enika uncertainty te logot manu laga frustration, confusion aru trust komti hoa to obvious ase. Aji bishi manu bisari ase—peace talk to bhal karone ase, na time pass koribo karone? Development promise bhi enika ase juntu mostly paper te thakise. Election time te road, electricity, school, hospital, job aru rural development nimite dangor dangor kotha diya jai, kintu pura result to kom dikhai. Bishi jagah te road kharap ase, light biya hoi thake, aru medical center to staff na thaka nahoile materials na thaka karone chalibo napare. Fund to allocate to kora jaise, kintu implement te corruption, delay aru accountability nai. Youth nimite job promise bhi fail korise. Educated youth khan ke job diya, unemployment kom koribo kotha kora thakise, kintu private sector te job to kom ase, aru government job te nepotism aru backdoor appointment besi dekha jai. Etu karone bishi young manu khan to job na pai, bishi state bahar te jai jai. Tai khan laga potential khan waste hoi jaise, aru frustration bhi barhi ase. Entrepreneurship aru small business promote koribo kotha kora to bhi paper te restricted ase. Scheme ase, kintu support, training, fund aru market access nai. Young entrepreneurs khan ke red tape aru system te face kori thakibo lage. Self-reliant hobo kotha to ase, kintu practical help nai. Education sector te bhi urban aru rural gap to dangor ase. Government modern school koi, kintu bishi rural area te teacher nai, building kharap ase, aru digital facility nai. Rich manu laga bacha to private school te bhal education pai thake, kintu ordinary manu laga bacha to chance nai. Inclusive development kotha to khali speech te ase. Transparency aru good governance promise khan bhi repeat to kora jaise, kintu practice kom ase. RTI apply korile answer late pai, aru juntu corruption expose kore, tai ke problem face koribo lage. Public trust to weak hoi jaise, karone manu khan laga voice ke ignore kora jai thake. Nagaland manu khan to hope rakhise aru adjust kori thakise. Kintu etu patience ke weakness naphabibo lage. Jodi promise khan fulfil na kore, tate trust pura harai jabo. Leaders aru government ke etya serious action loile he bhal hobo. Accountability enforce koribo lage, corruption bandh koribo lage, aru development ke real life te ana important ase. Election time te vote pa bole promise na kori kena, real action dibo lagibo. Nagaland deserve kore ekta future juntu te kotha khan fulfill kuri dibo, aru manu life improve hobo. Etu he hobo real progress.
March 10, 2026
World's First and Only Nagamese Newspaper
Add Comment