Navjot Singh Sidhu ke Punjab Congress chief junishe

July 20, 2021. Amarinder Singh aro tai laga party khan para kelaff kora jarikena, Congress High Command para Navjot Singh Sidhu ke notun state party te Punjab laga chief junishe koishe. Congress High Command para Amarinder Singh’s laga kotha oper te president junaiboli kotha toh mana nai koishe. Sidhu ke Punjab Pradesh Congress Committee (PPCC) president juna toh All India Congress Committee (APCC) general secretary KC Venugopal para press release te janaishe. “Congress president para Navjot Singh Sidhu ke Punjab Pradesh Congress Committee laga president junishe,” koikena press khobor hesab te koishe. Congress president Sonia Gandhi para be Punjab Pradesh Congress Committee te 4 jun ke working presidents junishe. Punjab Pradesh Congress Committee te notun working presidents junai khan toh Sangat Singh Gilzian, Sukhwinder Singh Danny, Pawan Goel aro Kuljit Singh Nagra ase koishe. Navjot Singh Sidhu para Sunil Jakhar ke PCC chief of Punjab putli korishe. “party khan para jai jowa PCC president Sunil Jakhar ke tai laga bhal kam nemite kushi powa janaishe,” koikena aro press khobor para koishe. Punjab Congress laga notun working president, Kuljit Singh Nagra ke All India Congress Committee (AICC) Sikkim, Nagaland aro Tripura in-charge te jodi thishe. Amarinder Singh para Sidhu oper te state party president junai nemite besi kelaaf korishe. Amarinder para working presidents aro PCC chief nemite 4 jun laga nam loikena aha khan toh Cabinet minister Vijay Inder Singla, Raj Kumar Chabbewal, Tarsem DC aro Ajit Inder Singh Mofar, thakishe koikena media para janaishe. Khobor hesab te Amarinder camp te Sidhu logot keliboli thaka toh Punjab CM Amarender Singh neshiana Jat Sikh neshina thakishe. Sidhu ke juna beche jai jowa president Sunil Jakhar para koishe ke, Assembly election nemite 6 moina thaka samai president para tangor kam koriboli lage koishe. “ami logot besas ase ke bapana neshina hoikena party aro Punjab manuh ke oper te loikena jabo,” Jakhar para kowa kotha toh media para janaishe. Sidhu toh BJP leader ase aro tai 2017 Assembly elections samai Congress te joined korishe. Amarinder aro Sidhu majot te April moina para jamila hoikena ahi ase, Twitter te Sidhu para CM oper te besi hamla korikena ase. Khobor hesab te Amarinder para koishe ke, Sidhu para maaf namaka dak tai logot kotha nakoboli koishe.