SHILLONG, SEPTEMBER 23 : Child Right, Human Trafficking (Sex & bonded labour) nemite NE India te 2nd Regional Consultation din manaise. Etubi International Justice Mission (IJM) & North East for Child Rights kan pora Nagaland State Legal Services Authority (NSLSA) aro Meghalaya State Legal Services Authority (MDLSA) logot eke pora melekena. Aro etu din mana toh Yojna Bhavan, Shillong te 22nd September 2018 te manaise koise.
Etu din te Keynote Address de kena Hon’ble Mr. Justice Mohammad Yaqoob Mir, Chief Justice, Meghalaya High Court laga aro Patron-in-Chief MDLSA laga pora Section 370A IPC toh 2013 te naam te anedese. Etu ke kun-kun chotu bacha (minor) kan andashte uthai luijabo aro Sexual Exploitation te kam kuribole debo etu kan ke chuti thuri baise koile thik pora ekdam husir laga saja debole kotha manai kena ase. Aro etu saja toh 5 sal nejete nahobo, aro saja toh 7 sal porabi besi hisabte uthaidebole bari, aro etu kan oporte poisa (fine) bi mangebo bari koi kena manai kena ase koise. Tai bi etu Bacha kan laga chamala hisabte kotha kurikena ami kan Northeast India jaka te besi etu chamala hui. Aro etu chamala kan hua toh sob kam nabai kena, dukhiya, kam besari bole jaa kan nemite hi hui ase koi kena janaide thakise. Tai bi etu nesena chamala toh Assam state te besi hui kena ase koise. Etubi ami kan Desh laga sob states kan majutte. Aro etu khobor toh National Crime Records Bureau 2015 hisabte lekhe kena ase koise.
Etu kan sob chamala nemite tai NGOs nahuile kunbi hobi etu kan ke etu chamala nemite thik pora sabole kuribi aro ekdam husir pora kam julai kena thakibole kuribi koi kena janaide thakise.
Etu din te Session on access to justice toh Mr. Sanjay Macwan, Regional Director IMJ pora kuridese. Regional Consultation laga Background toh Mr. Mahendra Singh M. Sengar, Senior Consultant IJM and Convener NEFCR pora kuridese. Aro Welcome Address toh Mr. W. Diengdoh, MJS Member Secretary Meghalaya State Legal Services Authority pora kuridese koise.
Working session time te Mr. Sunitha Krishnan, General Secretary Peajwala Hyderabad pora human trafficking chamala te phasi kena thaka kan kinika bhal te sabole aro pachaidebole baribo etu kan janaise, Mr. Davis Marak, IPS, Supretendent of Police East Khasi Hills District pora toh Human Trafficking nemite Police kan kinika husir pora kam kuribole lagi etu kan janaise, Mrs. Mezivolu T Therieh, NJS Member Secretary NSLSA pora toh SALSA kan kinika NE te human trafficking chamala nemite kam julabole aro kotha manabole kuri etu kan janaise, aro Mr. Mahendra Singh M. Sengar pora toh human trafficking, NE laga bhal kotha janaide thakise koise.
Etu din te State Legal Services Authorities, District Legal Services Authorities, Child Welfare Committee, Police Department, CHILDLINE, Social Welfare pora 230 members kan aro students kan shillong law college aro NEHU pora ahe kena thakise koise.
Add Comment