NEET-UG re-exam: NTA para centre change kuri shae

June 21, 2024: 1,563 candidates karne National Eligibility cum Entrance Test (NEET-UG) re examination tho Sunday din deh lubo leh as. Examination centre deh officials National Testing Agency (NTA) aro Union education ministry kan b taki bole ase, officials para Friday din deh kui shae. Taikan para students kan keh choitha nutun centre issue kuri nah ase kui shae. May 5 deh lua examination deh students kan time hara karne, taikan keh grace marks kan di nah taki shae. Hoile b Officials para utu 1,563 candidates kan karne NEET UG re examination conduct kuri bo kui shae. Delay tho kalti question aro pata OMR sheets kan bhak kura karne hui shae. Etu issue tho Meghalaya, Haryana, Chhattisgarh, Gujarat aro Chandigarh deh taka choitha exmiantion centre deh report hui shae. Friday din deh Senior NTA Officials kan para Sunday din deh re-exam conduct kuri bole ase kui shae satha centre deh. “Sob examination centre keh change kuri nah ase. Hoile b Chandigarh laka ekta centre deh, kuteh khali tuita candidates heh apply kuri bole ase, utu centre tho change nakuri bo,” ekta senior NTA official para kuri shae.