Kathmandu: August 12, 2020. Nepal para Indian manuh nemite chaka-chaka te entry points tuh atha kuri thikena 20 para 10 he bonai thishe aro International flights tuh August 31 dak aro lamba kurishe, keli koile Nepal te coronavirus cases tuh besi otha nemite ase koishe.
Monday sam, Prime Minister laga Official Residence Baluwatar te meeting thakina COVID-19 Crisis Management Centre (CCMC) khan laga kotha hesab te fesla kura tuh loboli koishe. Government para COVID-19 bemari tuh besi spread kora nemite March 24 darik te first lockdown kurishe aro 120 din thaka beche lockdown tuh konuba kuli thishe. Etu beche Government para aro junai thishe ke, lamba rasta te pera public transportation services, domestic aro international flights khan tuh August 17 darik para kuli thibo plan kuri ase koishe.
Cabinet meeting samay aro fesla kurishe ke, Nepal te Indian manuh nemite 20 entry points thaka tuh 10 he kuri thishe, keli koile COVID-19 bemari tuh besi spread hoiase aro cross-border te checking natha nemite ase koishe. Security khan border chaka te thakina unauthorised manuh perai thaka ke check kuriboli ase, koikena officials para koishe. Tuesday din, Nepal te notun coronavirus cases tuh 683 paishe aro etu melaikena desh te 23,948 cases hoikena ase. Tuesday din, Kathmandu Valley te 134 notun coronavirus cases paishe, ek din pithor te sobse besi wala cases ase koikena Kealth Ministry para janai thishe. Aro 24 gonda pithor te COVID-19 bemar para aro char(4) jun manuh morishe, etu melaikena desh te manuh mora tuh 83 hoishe. Health Ministry hesab te, etai dak desh te coronavirus active case tuh 7,201 ase koishe. Media briefing samay, Ministry of Health aro Population laga spokesperson para koishe ke, desh phur te, 24 gonda pithor te polymerase chain reaction (PCR) tests tuh 10,562 manuh logot loikena ase. Aro etai dak desh te, 462,698 PCR tests loikena ase. Tai para aro janai thishe ke, 171 manuh khan boile te positive test paikena thaka tuh 24 gonda pithor te bhal hoikena discharged hoishe. Etu nemite, Tuesday din dak te, coronavirus bemari para bhal hoikena thaka manuh tuh 16,664 ase”, tai aro janai thishe.
Add Comment