New Delhi, February 25 : WWE wrestler John Cena para olop din ageyte Shah Rukh Khan laga ‘Dil To Pagal Hai’ film para ekta popular gana ‘Bholi Si Surat’ gaikina sob fan ke surprise kuridisey. Etu viral video para bisi manu laga dhyan khichisey. Aro Bollywood laga King Khan(Shah Rukh Khan) para bi morom paisey. Shah Rukh Khan para etu viral clip te react kurikina tailaga morom patahaisey. 

Etu viral video te, John Cena para koisey, “Jitya apni growth laga rasta chuney apni kotey para sikhibo parey etu kitya bi najaney. Etya amikhan gym te asey, amikhan grow kuri asey. Agey baribole nimitey bisi rasta asey, etu nimitey ami tu etu gana sikhibole kosis kuribole asey.” Etu kuwa picheyte, tai para ekbar te etu gana sikhi jaisey.

Shah Rukh Khan para X(poila te Twitter) te etu video ke react kurikina, tai para John Cena ke aro bisi gabole dibole nimitey tailaga latest gana khan pathabo koisey. 

Etu gana ‘Bholi Si Surat’ ke originally Udit Narayan aro Lata Mangeshkar para kurisiley. Aro etu release hoikina bisi saal hoija picheyte bi etya tak bi etu gana para manu khan laga mon ke khusi kuridiye.  ‘Dil To Pagal Hai’ film tu bisi bisi Filmfare Awards jitisey.

Etu bich te, Shah Rukh Khan ke akhri bar ‘Dunki’ te Taapsee Pannu logotey dikhisiley. Tai para tailaga fan khan ke tailaga next film laga hint dikina josh baraidisey.