India te James Augustus Hickey para January 29, 1780 te first print kora wala newspaper Hicky’s Bengal Gazette introduce kora homoi para India tu bisi dur pungchisey. Hodai saal January 29 tu Indian Newspaper Day manai, kuntu tu Hicky’s Bengal Gazette laga publication laga yaad te manai. Etu para khali newspaper industry nimitey foundation dhala ekla nohoikina desh te journalism laga jamana te bi anisey. Indian Newspaper Day para India te print journalism laga etihas aro India te print journalism laga lasting hoikina chuli thaka journey ke bi honour kurey. Aro sobsey jaruri kotha tu etu para Press Freedom laga spirit ke celebrate korey.
Juwa 245 years para, jankari feilabole aro democratic process laga raksha kuribole aro democracy laga fourth pillar nisna serve kuribole te India te newspaper para bisi modod kurisey. Bisi publication khan censorship aro poisa laga karon nimitey bon hoijaisey hoilebi newspaper khan tu etu musibat khan ke par kurikina development, corruption aro samaj te nyay dila nisna mamla khan ke address kora te agey barithakibole continue kuriasey. Desh laga bhasa aro cultural diversity te(alag alag culture laga manu khan) saisey koiley, aji, India tu duniya te ekta sobsey dangor newspaper market hoikina asey, kotey alag alag jaga aro bhasa janiya manu khan nimitey bisi alag alag bhasa te newspaper publish hoi.
Newspaper tu etihas te eman jaruri thaka aro pura duniya te chola laga bawajut, aji newspaper khan nutun musibat laga samna kuri asey, kuntu toh technological, economic aro socio-political karon para olai asey. Ajikali jamana laga manu khan majotey news pora laga preference bodli hoi thaka te solution olabole kosis kora tu purana jamana laga newpaper nimitey ekta dangor bojh hoikina asey. Ajikali jawan manu khan chatpata, sabole bhal thaka news bisarey kuntu toh online platform(jaiseki instagram, google, twitter khan) te pai. News pora manu khan tu latest news aro update pabole nimitey online platform chuni asey. Aro etu para newspaper laga supply te affect kuriasey.
Newsprint, ink, print kora aro supply kora laga khorcha tu bisi bari asey. Aro etu para chutu newspaper publish kora company khan ke profit kamabole mushkil kuridiasey. Sobsey dukh laga kotha tu samaj aro politics te power dhurikina thaka manu nohoilebi party khan para pressure dhala tu asey. Kanooni action lobole laga dhomki diya para ban kuridiya taak, etu pressure khan para press laga azadi te badha ani asey. Etu musibat khan tu bisi dangor asey hoilebi newspaper khan te poila para thakikina aha biswas para newspaper ke jankari pa laga ekta biswas kuribole para source banai. Indian Newspaper Day 2025 tu ‘digital age te print media laga role’ laga theme logotey ethical journalism, kotha express kuribole laga freedom aro press freedom kiman jaruri asey etu laga importance janai asey. Duniya agey barithaka homoitey, newspaper tu jankari dibole, rajya laga manu khan ke sikhabole aro hosla barabole te jaruri role nibhabole continue kuribo lagey
Add Comment