Nijor laga barbadi

Mamata Banerjee laga political(rajneetik) career tu girikina utha aro himat para khara hoikina thakibole para laga ekta testament asey. Tai tu 1984 te West Bengal laga Jadavpur consistuency te ekta experienced Communist leader Somnath Chatterjee ke haraidikina India laga sobsey chutu parliament member hoisey. Etu jeet tu tailaga rajneetik journey laga suruwat thakisey kuntu te Mamata ke bisi political toofan nohoilebi badha aha ke paar kora dikhisey. Aro enaka kurikina 2011 te West Bengal laga first maiki Chief Minister hoisey. Utu homoi para loikina, tai tu etu position ke lagatra 3(tin) bar dhurisey. Prime Minister Narendra Modi aro Amit Shah para lead kura Bharatiya Janata Party(BJP) para harabole mushkil  aro kara opposition thaka laga bawajut bi Mamata para etu jeet hasil kurisey. Bisi pressure under te thaka laga bawajut Mamata para etu kamyabi hasil kora nimitey tai “Iron Lady of Begal” aro “Bengal Tigress(Bengal laga sherni)” laga naam paisey. Tailaga sobsey dangor challenge tu 2021 laga assembly election te ahisey jitya tai para ekta kathor aro haar namana BJP laga samna kurisey, kun para taikey tailaga seat para hatabole nimitey sob available resource aro Governor laga office tak bi cholaidisey. Hoilebi, Mamata para lead kora Trinamool Congress (TMC) tu BJP nimitey bisi tagra sabit hoisey. BJP laga  pura desh te takat thaka laga bawajut West Bengal te jeetibole nimitey support panai. TMC laga poila para thaka rival(mukabala) Left aro Congress party para West Bengal te  taikhan laga support base haraija dikhisey aro TMC logotey mukabala kuribole napara hoisey. Hoilebi Mamata laga political journey te bi bisi jhamila olaisey. TMC laga opor te corruption(poisa kha), violence(mara-mari huwa) aro control banaikina rakhibole nimitey muscle power laga istamal kora laga iljam lagikina asey. Etu mamla ke West Bengal te  ajikali majotey huwa ekta ghotna para aro bisi baraidisey. Kuntu para Mamata laga leadership ke dangor khatra te dhalidibo parey. Etu ghotna tu August 9 te RG Kar Medical College Hospital te huwa ekta darawna ghotna laga bari te asey. Kotey ekjun female postgraduate(Masters kora) intern laga rape aro murder hoisiley. Etu ghotna para rajya(West Bengal) ke bhitor tak hilaikina rakhidisey. Etu ghotna para TMC government laga bhitor te ekta gehra kharabi thaka tu expose kurisey. Khas kurikina Mamata para Sandip Ghosh ke protection diya tu dikhibole parisey. Sandip Ghosh tu etu RG Kar Medical College Hospital laga botnam hoikina thaka former principal asey. Sandip laga poila laga record tu corruption laga iljam, gairkanooni kaam te shamil thaka aro galat management kora para bhorta hoikina asey. Tailaga khilaf te enaka serious iljam lagikina thaka laga bawajut, Sandeep tu Mamata laga nigrani te shaktishali position enjoy kuri thakisey. RG Kar Medical College Hospital te etu intern murija laga mamla te tai tailaga post para resign kuridiya logalog taikey dusra dangor aro izzadar position te reappoint kuridiya para public laga gusa aro baraidisey. Calcutta High Court para etu mamla te gusa picheyte hey Sandeep Ghosh tu suspend hoisey. Aro etu case  Supreme Court laga nazar te ahisey kun para Mamata laga government ke murija maiki laga raksha kuribole napara nimitey criticize kurisey. Etu mamla tu khali Mamata laga izzat ke giraidiya laga ekla nohoikina kanoon laga suraksa te tailaga government fail huwa laga ekta kara reminder asey. Kuntu para public laga biswas ke haraidisey. Etu baar Mamata laga political journey te badha aha tu dusra party para nohoikina nijor laga golti para asey.