Kohima, March 13: Assam Rifles (South) laga Operation Sadbhavana under te, National Integration Tour (NIT) laga hisa te, Manipur laga Tengnoupal District laga alag-alag school laga student khan para 13th March, 2025 te Kohima laga Raj Bhavan visit kurikina, Governor of Nagaland La Ganesan ke lok kurisey.
Etu students logotey baat-chit kurithaka homoitey, Governor para koisey ki amikhan laga desh laga alag-alag jaga laga manu khan laga kha-luwa laga style, culture, kapra khan alag-alag hoisey koilebi amikhan majotey ekta hoikina thaka aro ekey identity(pehchan) thaka laga bhabna asey kuntu para amikhan ek Indian banai. Tai para alag-alag community khan para khali knowledge pa laga ekla nohoikina taikhan laga culture laga nyom khan ke appreciate kuribole laga feelings develop kuribole laga importance te jor disey. Ageybarikina, tai para India te manu khan para bisi alag-alag bhasa chola tu recognize kurisey aro etu bi koisey ki alag-alag bhasa chola laga bawajut manu khan tu ekjut hoikina thakey.
Etu Governor para Indian culture te hospitality(dusra laga seva nohoilebi khatirdari kora) laga importance janaisey. Aro student khan ke yaad dilaisey ki, taikhan Manipur laga alag-alag community para aha laga bawajut taikhan sob para dimag te etu yaad rakhibo lagey ki amikhan sobsey poila Indian asey aro amikhan sob bi Mother India laga garv hoikina thaka beta aro beti khan asey.
Etu te participate kora student khan para taikhan laga tour te India laga alag alag jaga visit kora laga experience aro bhabna khans hare kruisey. Major Jagminider Singh Khalsa, kun etu National Integration Tour laga in charge thakisey, tai para ekta welcome speech disey aro etu tour laga maksat ki asey etu pura detail te explain kurisey.
Add Comment