Patna, November 8 : Bihar laga Chief Minister Nitish Kumar para Wednesday (November 8) tea lag alag jaga para tailaga against te kotha aha picheyte population control kora laga kotha nimitey maafi mangisey.
Nitish Kumar para tailaga against te protest huwa tu dikhikina sidha reporter khan fale jaikina mafi mangisey etu tu BJP MLA khan para assembly laga main entrance ke block kuridiya picheyte asey. Nitish Kumar para maafi mangikina koisey, “Ami para kun laga bi mon bikhaidisey koiley maaf mangi asey. Ami para etu kotha tu kun laga bi mon bikhaidibole nimitey kuwa nai. Ami para hodai etu koi thakey ki population ke control kuribole nimitey pora likha jaruri asey. Ami para maiki khan laga hosla barabole aro maiki khan laga development nimitey bi khara kurisey.”
Nitish Kumar para Tuesday din te ekta ghotna olaidisey, population ke control kuribole nimitey maiki khan laga majotey pora likha kiman jaruri asey etu koi thaka homoitey tai para state assembly house te pora likha thaka maiki khan para mota logotey sexual intercourse kora homoitey kinaka rokhabo parey etu laga ekdam asli nisna description disey.
Nitish Kumar para enaka samjhaisey, “ Mota khan laga harkat para hey bisi baccha jonom hoi. Hoilebi, pora likha thakikina, ekjun maiki para kinaka kurikina tailaga mota ke rokhabo lagey etu janey…aro etu nimitey baccha jonom huwa laga number tu komti hoi asey…Apni, journalist khan para bi etu bhal para buji asey. Poila te baccha bukha laga rate tu 4.3 thakisey, hoilebi etya etu rate tu 2.9 hoijaisey. Aro joldi hi amikhan 2 te pungchijabo.”
BJP para joldi hi Nitish Kumar ke enaka kotha kora nimitey hamla kurisey aro tailaga kotha khan tu maiki khan laga khilaf te ja laga, letra aro patriarchal asey koikina taikey Chief Minister laga post para resign kuribole demand kurisey.
Etu bich te, National Commission of Women para bi Nitish Kumar ke enaka kotha ora nimitey gusa jataisey aro koisey ki Nitish Kumar tu legislative assembly te maiki MLA khan laga mojudgi te ekta C-grade movie nisna kotha kurisey.
Add Comment