Niuland District tey DPDB meeting loishey

September 09, 2024: Itu Niuland, District Planning & Development Board (DPDB) laga muhina laga meeting loishey, 9^th September, 2024 tey, DC laga Conference Hall tey para, Niuland laga. Itu meeting tey Additional Deputy Commissioner, S. Athsangla para chair kurishey aru itu jawa muhina laga meeting tey ki ki laga kotha kurishey utu khan laga khata para review kurishey. Itu District Administration para bhal para kotha khan aru consultation khan kuria pichetey, itu Sub Divisional Education Officer aru itu District laga High School khan laga Head Master khan logotey, tai para decide kurishey ki, Administration Officer khan toh hoiley Government High School khan ke adopt kurilobo koi kena, itu school laga pura status khan improve kuriboley karney itu school khan laga performance khan. Itu house para alag alag agenda khan opor tey kotha khan kurishey aru approve kurishey, itu nichetey di kena thaka khan: State Disaster Response Force (SDRP) Personnel laga posting, Niuland District nimitey, aru society khan laga Registration aru Renewal khan opor tey bhi kotha khan kurishey aru decide kurishey scrutiny khan kuri kena he kuribo koi kena aru perform nakuri thaka society khan toh aru- renew nakuribo koishey. Itu board para department officer khan laga urgent posting laga opor tey bhi kotha khan kurishey aru alag alag department khan – Treasury Office, Post Office, Transport, Labour & Employment, Fire & Emergency, Soil & Water Conservation, Water Resources, Evaluation, Economics and Statistics, Home Guard & Civil Defence, Urban Development, IT & Communication aru New & Renewable Energy khan laga office building khan construct kuriboley laga kotha kurishey, kuntu khan toh discuss kurishey aru itu concern department khan ke forward kuridishey approval nimitey. Social Welfare Department laga officer khan para ekta power point presentation dishey, tai khan laga activity khan opor tey, itu district tey.