Nagaland

Noklak laka DPDB meeting lui shae

May 24, 2024
9 Views

May 23, 2024: Noklak District Planning & Development Board laka monthly meeting tho MLA Aro Chairman Noklak DPDB, P Longon laka pitor deh lui shae. Meeting tho Deputy Commissioner, Noklak laka Conference Hall deh lui shae, 22nd May 2024 din deh.

Meeting time deh, house para 56th A/C Noklak aro 57th A/C Thonoknyu, tuita laka LADP scheme karne b kotha kuri shae. Etu tuita tho approve kuri nah, concerned authority keh forward kuri bo ase, necessary action karne. District Disaster Management Authority laka Tanghiu para, SDRG personal tho Noklak Hq deh station hobo lakeh kui nah propose kuri shae aro emergencies taka time deh SDRG lakeh kui shae. Etu tho concerned authority keh forward kuri bole house para approve kuri shae. Noklak laka students kan para alak alak agenda kan bishi uthai shae. Tai kan para educational institution osor deh  tobacco products, alcohol aro alak intoxicant kan bika tho prohibit kuri bole lakeh kui shae. District administration aro concerned departments kan keh entrust kuri shae, phat action lubo karne.

Members para Baptist School Thonoknyu tho LP School para ME School deh upgrade kuri bo lakeh kui nah kotha b kuri shae aro etu mamla tho School Education keh pata bole acha kui shae. Kengnyu Village Council para Kengnyu Village deh cultural hall bana bole propose kuri shae. Etu tho house para approve kuri shae aro Department of Tribal Affairs keh patai di shae, consideration karne. Nukho bosti para society government registration karne submit kuri shae aro Choklangan village society para society registration laka renewal karne submit kuri shae. Etu kan keh approve kuri nah, concern authority keh patai di shae, consideration karne. 

MLA Longon para ekta hapta pitor deh tuipar chopper service taki bole propose kuri shae. Etu tho members kan para acha kui shae aro mamla tho General manager, Nagaland State Transport keh patai shae, necessary action lubo karne. Tai para members kan keh meetings kan tho regularly attend kuri b kui shae aro taikan laka departmental agendas kan ani b kui shae implementation karne.

(APRO Noklak)