North Korea pora US logode hosiyar

Seoul, 04 November: North Korea pora United States logode hosiyar janaideya toh, dukhiya government khan logode kelaf kori kena gara pora sanction kori thaga kothom kora nai koile nuclear state policy korai ahhibo koise. Besi sal nemide North khan toh byungjin” policy (nuclear bonabo karni) deh kethai thaga ase. April moina peninsula jaga deh peace thakibo karni North Korean leader Kim Jong Un pora nuclear mission kothom koribole janaideya thakise. Aro tai pora etu time deh tai laga desh toh “socialist economic construction” deh sabo kowah thakise. Hoilebe North’s foreign ministry pora janaideya toh, US ektum gara pora sanction kora rokha nai koile purana policy toh korai annibo. Friday deh deri hoi kena official KCNA news agency deh koikena thaga toh, ‘byungjin’ kotha toh aro-olabo pari aro etu toh ektum serious pora namibole ase. June moina Singapore jaga deh summit thaga time deh US President Donald Trump aro Kim majode denuclearisation nemide mana thakise. Hoilebe etu time pora lobo he kori kena ase aro Washington pora denuclearisation toh pura kothom nahowah tak North logode kelaaf kori kena sanctions koribole janaise. Friday din Fox News logode interview kora time deh US Secretary of State Mike Pompeo pora kowah toh, Singapore summit time deh kotha mana nemide Pyongyang pora denuclearisation kothom nakora tak North logode sanction koribo. Tai aro kowah toh, tai ahha hapta North Korean counterpart logode loh koribole ase.