Headlines

NPF Party kan Naga Identity nemite hi ase

October 24, 2018

KOHIMA, OCTOBER 24 : Naga People’s Front (NPF) President Dr. Shurhozelie Liezietsu pora Wednesday din te tai kan Party NPF toh Naga manu kan laga “Royal Guard” ase koi kena janaise. Kele tai kan Party toh manu kan nemite hi thaki ase aro etu pora Naga manu kan laga Identity nemite bi ahejai koi kena janaise.

NPF Kohima Division, Central Office te day-long Seminar mana ke kotha kurikena Dr. Shurhozelie pora Naga manu kan ke tai kan NPF Party toh ami kan desh te ekta 2nd purana Regional Party ase. Aro tai kan NPF Party toh Naga mati te ekdam nahua chamala ulai kena thaka time porahi ula laga ase. Aro tai kan Party toh Naga Identity pachaidebole karne ase aro Naga manu kan laga babuna ahkete luijai kena saidebole karne ase. Etu pora tai kan Naga political chamala nemite bi chulti pora saidebole kuri ase. Aro etu saidebole kura toh tai kan Party laga ahke babuna ase koi kena janaide thakise.

Tai bi NPF Party kan toh Power nemite hi election manai kena Political khel te thaka nahui. Huilebi tai kan Party toh Naga manu kan nemite bhal te ahkete luijabole karne ase koi kena janaise. Etu bejete tai bi, huilebi aji-kali laga Naga leaders kan toh Naga manu kan laga Political kahani toh sob bahuri jai kena poisa aro power nemite khetai ase koi kena janaise. Huilebi tai kan NPF Party toh eneka nahui. Aro tai kan NPF Party toh Naga Political kotha nemite hi thaki ase aro Naga manu kan laga Identity nemite hi thaki ase koi kena janaise. Etu oporte tai bi tai kan NPF Party nemite kam kura kan ke Isor toh ahkete ami kan laga mon de rakhibole lagi aro husa kotha nemite kam julai kena thakibole lagi koi kena janaise.

Etu din te NPF Secretary General aro MP Rajya Sabha KG Kenye porabi kotha kurise. Etu ke ai Regional Party kan ECI naam te asulte thaka toh khali tai kan NPF Party hi ase. Etubi Naga koi kena Naga manu nemite mata aro Naga Identity nemite thaka hisabte koi kena janaise.

Etu din te bi Thenucho Tunyi, ex-Minister aro advisor to NPF President porabi kotha kurise. Aro etu 1 din Seminar thaka Din toh Kruzakie Kelio, NPF Vice President CoB pora ahkete luijaide kena manaise. Aro Welcome kotha toh Guonei-u Sirie, President Kohima Division pora kuridese aro Vote of Thanks toh Khrielezo Bio, General Secretary CoB pora kuridese koise.

Etu din te bi Kohima Division kan pora tai kan toh Dr. Shürhozelie Liezietsu, NPF President aro Mr. TR Zeliang, NPF Legislature Party Leader laga Leadership bitorte hi support kuribole ase. Aro tai kan bi 26 NPF MLAs kan General Assembly election te chetikena MLA nemite hua kan ke tai kan NPF Party logot besi bisas dangor kurikena thaka pora besi khushi baa janaise kosie.

Kohima Division kan bi PDA Sorkar kan ke neju ki kossom khai kena kam manibole kuri ase etu ke husa kebi kam julai kena thakibole janaise. Etubi ki-ki Developmental activities kan nemite ahkete anedebole karne kossom khai kena thaka nemite. Aro Four-Lane Kohima-Dimapur Highway banabole kurikena thaka toh husa kebi Public kan nemite bhal hobole karne chulti pora banai khotum kuridebole kuribi koi kena janaise.