NOKLAK, NOVEMBER 13 : NPF President, Dr Shurhozelia Liezietsu pora Tuesday din Naga People’s Front toh Naga manu laga ekta Identity ase. Aro NPF Party toh Naga manu aro Naga Nationalism nemite hi ase koi kena janaise. Etu karne tai NPF Party porahi Naga manu laga babuna nemite ahkete ahe kena ahkete luijabole kuribo. Aro Naga Political chamala toh chulti pora kotha mela kuridebole kuribo koi kena janaise.
Notun NPF Noklak District Division Office khola din te kotha kurikena purana CM Dr. Shurhozelie pora NPF Party toh khali Political Party ekela hi nahui. Huilebi Naga manu laga Gurdian ekta ase koi kena janaise. Aro tai kan Party NPF toh tai kan laga asul babuna ki ase etu hi kuridebole karne mon te rakhibo. Aro etu toh Naga Political chamala laga kotha mela kuridebole kuribole laga ase koi kena janaise.
NPF President Dr Shurhozelie porabi tai kan NPF Party laga murgi noksha toh kedia Naga mati te besi chakara huikena khoon-shoon bi ulai thaka time te ula laga ase. Aro etu ula toh ami kan Naga manu kan nemite bhal karne ula laga ase. Etu karne NPF Party toh Naga manu laga Guardian ase koi kena janaise.
Etu NPF Noklak Divisional Office khola time te etu NPF President porabi notun Officer bearers kan anediya ke bisas dangor kam julai kena ahkete jabole kuribi koi kena janaise.
Etu din te NPF Secretary General aro Lone Rajya Sabha MP, Kenye pora bi manu kan chama kurikena thaka ke kotha janaide thakise. Etu ke tai bi NPF Party hi Naga manu nemite bhal pora ahkete luijabole karne asulte kam julai kena ahkete jabole laga ase koi kena janaise. NPF Working Presidents, Apong Pongener aro Huskha Yepthomi aro tusera alak-alak Speakers kan pora bhal kotha kan janaide thakise koise.
Add Comment