Nagaland te, NPSC, Nagaland Public Service Commission, ekta respected institution hoi jaise. Bishi educated youth khan laga sabna ase NPSC clear kuribole, aru ekta bhal government job babole. Civil service to respectable aru stable job ase, etu to bhal kotha ase. Kintu ekta problem to ahi jai ase, moi khan laga focus sob to NPSC opor thaka karone, society te dusra rsata khan to na dikhai hoi jai ase. Etu ekta mindset ahi jaise juntu future entrepreneur, innovator, thinker khan ke harai ase moi khan.
Hoi Civil service ekta important hisa ase society run kuribole aru state building te, kintu civil exam ke opportunity karone ekla channel bonai dile, future te ekta long term biya effect thakibo, intellectual aru economic te.
NPSC exam te prepare kuribole, thousand talented aru capable students khan bishi saal phor coaching center join kuri thake, bosti bosti bohi thake, aru prepare kuribole saal saal lagi te. Kunba 2-3 saal, kunba to 5-6 saal bhi kosis kuri thake. Aru etu laga opor to limited seat ase, etu karone majority fail he kuri thake.
Result delay, transparency problem, complaint sob thaka karone youth laga morale bhi down hoi jai. Aru exam clear nakura khan karone society te ekta biya stigma lagi jai.
Etya question to ahe — etu time aru energy jodi alak constructive rasta te jabo parile, ki hobole paribo? Kunba manuh entrepreneur hobo pare, kunba innovative start-up suru kuribo pare. Kunba researcher hobo pare, kunba education, music, film, science, media, agriculture, nahoile IT field te contribution dibo pare. Kintu NPSC ke ekta dharm nishina dream bonai diya karone, etu restricted mindset develop hoi jaise.
Alak state khan te, Karnataka, Tamil Nadu, Assam, etc., te entrepreneurship aru innovation ke support kuri ase. Youth khan ke government scheme, business grant, digital skill training, start-up funding di ase. Etu karone tai khan laga economy bhi grow kuri ase. Nagaland te to enika initiative kom ase, aru educated youth khan bhi risk loi kena alak field try kuribole interested nai — karon NPSC fail kurile ekdom hopeless feeling hoi jai.
Parents aru society bhi etu change accept kuribo lage. Sob student NPSC clear kuribo na baribo — etu reality ase. Kintu etu mane nai ki sob jaka te biya ase. Ekjon manuh NPSC fail kurileo, digital marketing, YouTube, online business, teaching, farming, handloom, design, artisan — etu sob te bhi future thakibo. Etu khan ke value dibole laga time ahi se.
Government ke bhi responsibility ase. Entrepreneur aru creative mind khan ke support dibole. Start-up incubation center bonai dibo lage, loan process easy kuri dibo lage, local product promote kuri lage. Education system te bhi change ani bole lage — textbook memorization ekla nahoi kena, critical thinking, real-life skills, digital knowledge dibole lage.
NPSC important ase, kintu etu he Nagaland laga future nahoi. NPSC pass kurile ekjon bhal officer hobo pare, kintu ekjon entrepreneur 10 manu ke job dibo pare. Ekjon thinker society ke inspire kuribo pare. Ekjon artist culture ke zinda rakhibo pare.
Nagaland ke future te bhal position te loi jabole hoile, ami khan ke sob type laga manu — civil servant, entrepreneur, thinker, researcher — sob ke encourage kuribo lage. Ekta dream te he boi thakile, ami khan laga society to grow na kuribo.
Future to change hobo pare, jodi mindset change hoile. Enika time te, ekta dream ekla na thaki kena, thousand dreams explore kuribole important ase.
Add Comment