Peren, March 27: Nagaland State Commission for Protection of Child Rights (NSCPCR) para ek-din laga ‘Awareness Programme on Child Rights’ organize kurise St. Xavier Parish Jubilee Hall, Jalukie, Peren te, 26th March 2025 te. Etu programme laga asol aim tu stakeholders khan ke ek jaga te anikena child rights aru protection laga bari te aro bisi manu ke janabole aru bhal pora informed action lobole karone ase.
NSCPCR Chairman, Alun Hangsing para keynote address te Commission for Protection of Child Rights tu kinaka establish hoisey aro etu Commission laga importance ki asey etu janaisey. Tai para janaisey ki etu Commission tu ekta autonomous statutory body asey(matlab etu prganization para nijor laga decision lobole parey ) aru etu laga main kaam tu najar rakhibole aro Government laga laws, policies aru programme khan sob sob child rights logotey milikena ase na nai etu sabole laga asey. Tai para agey barikina Rights of Children laga 10ta fundamentals laga bari te bi explain kurisey, kuntu te Right to Survival, Right to Education, Right to Protection, Right to Participation, Right to Development, Right to Health & Well-being, Right to Identity, Right to Expression, Right against Discrimination aru Right to Safe Environment khan shamil asey.
ADC Jalukie, T. L. Kiusumong Tikhir para tailaga speech te NSCPCR Chairman aru State Commission ke dhanyabad janaisey etu awareness programme Jalukie te rakhq karone. Tai para janaise ki baccha time laga homoi tu manu laga life te ekta important aru memorable homoi ase, aru etu time te sob stakeholder(ama-baba, family, teacher) khan milikena ekta safe aru healthy environment bana bole lagey.
NSCPCR Legal Consultant, Lichani Murry ‘Juvenile Justice (Care and Protection of Children) Act’ laga bari te explain kurisey. Tai para janaise ki etu Act tu baccha khan laga protection aru development karone ase, aru taikan ke child-friendly(baccha khan khusi pa) approach logotey care aru rehabilitation dibole aim kuribo. Etu Act te duita category ase – Juvenile in conflict with law (State Government/Juvenile Boards handle kuribo) aru Children in need of care and protection (State Government/Child Welfare Committees handle kuribo). Tai para legal provisions bi highlight kuri dise, kuntu toh women protection, child support, adoption procedures aru rehabilitation logot mili ase.
NSCPCR Member, Akumla Longchari para ‘Protection of Children from Sexual Offences (POCSO) Act, 2012’ laga presentation te janaisey ki etu Act te 18 years para komti umor laga bacha khan, kun sexual offences laga sikar hoikina asey, taikan ke protect kuribo ase. Tai para janaise ki Child sexual abuse rokhabole laga zimidari tu sob manu laga ase, khali Government laga ekla nohoi. Sob manu milikena bacha khan ke ekta safe aru secure environment dibole lagi ase kotey taikan dignity(izzat) aru violence pora free thakibole paribo.
NSCPCR Member, Aying Wangsha para ‘Children laga education right aru Right to Education (RTE) Act’ laga opor te speech dise. Tai para janaise ki etu Act te 6 para 14 years tak laga umar laga sob bacha khan ke free aru compulsory elementary education dibole ase. Tai para RTE Act 2009 laga main points, Government aru local authority laga kaam, Parents aru Guardians laga duty, School Management Committee (SMC) laga role aru State Commission for Protection of Child Rights (SCPCR) laga kaam laga bari te bi explain kuridise.
Asungbe, Legal-cum-Probation Officer, DCPU, Peren para bhi Peren district laga child issues status opor te ekta presentation dise.
Etu programme te Jalukie Sub-Division laga Office Head khan, Jalukie Town Councils laga Councillor khan, School aru Church representative, Tribal Hohos, Student leader, Youth Organisation leader, VCCs aru Dobashis khan attend kurise. Programme to Ibamsile Dwaswang, Coordinator, Child Helpline, Peren laga chairmanship te chulise, aru welcome address tu Yongchingkumla, Additional Secretary, Social Welfare & Secretary, NSCPCR para disey. Vote of thanks tu Pikato E Tuccu, DCPU, Peren para disey.
Add Comment