Nagaland

NSDMA Para Weather Advisor Issue Kurishey

April 4, 2024

April 03, 2024 : Itu Nagaland State Disaster Management Authority, Home Department para itu IMD, Regional Office Guwahati logotey collaborate kuri kena, itu weather update khan issue kurishey, itu aha din khan nimitey. Tai khan para state kurishey ki, bishi pani giri boley asey aru itu logotey thunderstorm aru hawa bishi mariboley asey itu state tey continue eneka he thakiboley asey koishey, 

Itu pani gira toh hoiley alag pre-Monsoon activity khan lightning, hailstorm, aru thunderstorm khan milai kena ahiboley nishina asey, aru itu logotey squally hawa khan, kuntu toh hoiley 16th April, 2024 tak thakiboley nishina asey. Itu district – Peren, Dimapur, Kohima, Phek, Wokha, Zunheboto, Kiphire, Mokokchung, Shamator, Tseminyu and Tuensang, khan toh partly cloudy aru heavy rainfall hoboley asey, aru itu logotey hawa jur para mariboley aru lightning bhi, isolate jaga khan tey hoboley nishina tey. Tai khan para aru koishey ki, itu maximum temperature toh hoiley 31℃ laga aas paas nishina hoboley asey aru itu minimum temperature toh hoiley ekta ekta dip dikhiboley asey itu homoi tey, kuntu toh hoiley 11℃ para bhi nichey giriboley nishina asey, itu hily area khan tey.

            Probable Impacts

  1. Visibility toh komti hobo parey, pani bishi gira para, kuntu para traffic congestion hobo parey.
  2. Olop homoi karney traffic toh rukhibo parey, pani jama hoa para raasta khan tey, nahoiley gaas khan gira para aha jawa tey dikdar hobo parey.
  3. Bera aru mati laga ghor khan toh olop damage hobo parey, pani bishi gira para/ landslide khan hoishey koiley.
  4. Pani bishi gira para kheti bari khan toh biya kuridibo parey, itya dangor hoi thaka time tey.
  5. Bhal jaga tey shelter loboley lagey itu thunderstorm khan aru lightning activity hoi thaka homoi tey.

      Actions suggested 

  1. Traffic laga advisory follow kuribi, judi issue kuri kena asey koiley.
  2. Komjur ghor nahoiley jaga khan tey nathakibi.
  3. Thik thak nala banai kena rakhibi, nijey laga kheti khan tey pani jur para gira time tey tatey para ulai jaboley.
  4. Ghor tey bahar najabi, adverse weather thaka homoi tey, kheti khan tey jai thaka, guru bandiboley jawa khan, maas mariboley jawa khan etc.
  5. Judi apni bahar tey thaka homoi tey weather toh biya hoa shuru hoishey hoiley, ucha ucha jaga khan tey para durr jabi.
  6. Kitya thunder maribo, safe jaga tey thakibi. Loha para bana laga building aru construction khan tey nathakibi, opor tey loha para cover thaka jaga tey nathakibi.
  7. Judi apni laga matha aru gola laga chuli toh achanak para khara hoishey koiley, phat para utu jaga tey para durr polabi, itu hoa maney tatey thunder/ lightning mariboley asey.