Nursing college te 117 students covid(+v) thurishe

April 27, 2021. Uttarakhand’s Sursingadhar Government Nursing College te 22 students logot COVID-19 positive thura nemite containment zone junai thishe. Chief Medical Officer, Suman Arya para koishe ke, students khan itya hostels te isolation te bohi ase aro sanitisation kam jai ase. “nursing college te 210 students thaka pithor te 117 students logot positive tested paikena ase. Hoilebi, 60 students neshina laga report toh negative paishe aro ghor manuh logot kotha korikena nejor ghor te jaboli thishe. Dosura students laga khobor toh aro roki ase,” koikena CMO para janaishe. Etu samai, District Magistrate Ranjana Rajguru para Udham Singh Nagar district te corona bemar toh besi othi-thaka nemite May 3 darik pura lockdown koriboli koishe. State health bulletin khobor hesab te, Uttarakhand te 24 gonda pithor 5,058 notun corona cases khobor paishe. Etu dik samai, bemari para 67 manuh morishe aro sob melaikena bemari cases toh 1,56,859 pongchise, etu oper te coronavirus bemari para state te manuh mora toh sob melaikena 2,213 hoikena ase. Dehradun te district authorities para coronavirus cases besi othi-thaka nemite, Monday sam 7 pm para loikena May 3 darik 5 am dak curfew junaishe, etu order toh Dehradun DM, Ashish Kumar Shrivastava para junaishe. Etu order toh district sob nemite ase etu oper te the Rishikesh Municipal Corporation jaga, Garhi Cantt aro Clement Town te be thakibo. Etu samai, private gari peraboli pura banned thakibo. Ration dukan neshina vegetables, fruits aro dairy saman toh 4 pm dak kula thakibo, koikena order te janaishe. Hoilebi, medicine shops, filling stations aro LPG agencies toh pura din kula thakibo. Etu notun order naola samia para Dehradun te rathi samai curfew toh 7 pm para loikena pujur 5 am dak thakishe.