DIMAPUR, OCTOBER 7 : Nagaland Voluntary Consumers’ Organisation (NVCO) pora Liquefied Petroleum Gas (LPG) khotum hua karne State Sorkar ke kotha huthese. Etubi District Administration/Deputy Commissioner kan sob ke. Aro tai kan bi etu khotum huijaa pora pura-puri diktar kuride ase koi kena janaise.
Khobor hisabte etu NVCO pora etu LPG khotum huijaa karne kakus pora nahui kena khushi-khushi ene bekka huijai ase (black marketing). Aro jua-jua 1 ta LPG Cylinder te daam besi uthejaa karne etu kala bazaar (black market) tebi 1 ta LPG Cylinder te besi huijaa huise. Etubi Kohima te 1 ta LPG Cylinder te Rs. 1600 aro Dimapur te toh Rs. 1400 manga huise koi kena. Huilebi asul te jua-jua daam utha hisabte toh Rs. 940 ase koi kena janaise.
Etu karne NVCO kan State Sorkar ke kotha huthe ase. Etu ke kele State Sorkar kan 1 ta LPG Cylinder ke manga daam ke pujibole nabari. Aro ami kan state te etu LPG Cylinders ana aro manga daam (supply and demand) ke daam eman alak hua ke pujibole nabari koi kena janaide thakise.
Etu oporte NVCO porabi Ayuverdic dawai (Medicines) Kohima te bekka ke husir kotha janaise. Etubi kele etu dawai diya time te eku kakus nai (no receipt) aro etu dawai kan ke eku naam, cover, label, khobor, expiry date (biya huijabole laga darek) aro tusera khobor nai koi kena janaide thakise.
NVCO kan bi PR Hill, Kohima te thaka Popular Bakery ke husir kotha janaise (warned). Etubi chuti biya huijaa khabole saman bekka thuri baise koile FIR dak bi thalidebole kuribo koi kena. Aro NVCO porabi Popular Bakery kan khushi-khushi ene tai kan kam kura manu kan (employees) lekha-bura nahua pora ase koi kena kotha na-ulabi koi kena janaide thakise.
Etu karne NVCO porabi Kohima te thaka kan ke etu Popular Bakery pora ki-ki khaa-lua saman kina time te bhal te biya hobole thaka darek toh sabole kuribi koi kena janaise. Aro Popular Bakery kebi tai kan Kohima te thaka manu kan ke eneka nahua aro biya huijaa saman bekabole nakuribi koi kena husir janaide thakise.
Etu oporte NVCO porabi Tuensang Chamber of Commerce & Industries (TCCI) kan ekta lagi thaka Intensive Care Unit (ICU) banabole kurikena bana karne besi khushi baa janaise. Etubi District Hospital, Tuensang te bana ke. Kele etu porahi Mon, Longleng aro Kiphire te thaka kan nemite bhal hobo koi kena. Huilebi etu nemite NVCO kan pora State Sorkar kan etu ekta ICU toh Eastern Nagaland Districts kan nemite District Hospital te etu ICU banabole karne eman chup-chap bohi thaki kena hi bana huise koi kena janaise. Aro tai kan bi Sorkar kan, etubi etu ICU banabole laga Department toh ekdam thik nathaka laga ase (very corrupted) koi kena janaise. Kele khobor hisabte (as per record) etu 1 ta ICU banabole karne Rs. 16 crore nesena poisa bhelaise. Huilebi etu ICU 1 ta bana hisabte khali 5 crores hi bhelai kena ase koi kena. Etu karne tai kan baaki tusera Rs. 11 crores toh kutte jaise koi kena Sorkar ke huthese koise.
Add Comment