ODI world cup 2023 laga tickets August 25 para bika shuru hubo.

New Delhi, 10 August : ODI world cup 2023 laga potli kurina thakia match schedule toh Wednesdays dey issue kurishey. International Cricket Council (ICC) aro Board of Control for Cricket in India (BCCI) para homai dishey ki ICC men’s world cup 2023 laga tickets toh August 25 dey bika shuru hubo.

Tournament aro warm-ups dey sob games laga ticket kutey India feature nakurey, itu August 25 dey agey bikabo.

“Tickets sale jaa agey dey, fans khan August 15 para nijor laga interest dey register kuriboley avsar pawo, itu link para https://www.cricketworldcup.com/register . Itu para taikhan ke ticket laga news agey pawoley enable kuriwo aro world cup dey nijor laga spot secure kuriboley paribo, aro Cricket laga khushi toh ek din dey experience kuribo pariwo,” ICC para kuishey.

“Muikhan eman khushi para homai di asey ki fans khan ICC Men’s Cricket World Cup 2023 laga ticket karoney information aro updates pawoley register kuribo paribo. Schedule toh, olob padla podli kuria piche dey itia toh finalize huishey aro fans khan itia toh tickets kiniwoley pariwo aro high-quality Cricket sawoley paribo. BCCI para sob hosting venues dey enjoyable experience thakiwo karoney eku pathor ulta nakurina nacharibo,” BCCI CEO Hemang Amin kuishey ICC para release kuria official statement ekta dey.

ICC men’s world cup 2023 laga tickets toh itu mahina sale shuru hubo aro fans sob ke kui asey ki aha hafta lara toh nijor laga interest dey register kurina agey ticket news pawoley pariwo aro sobse dangor Cricket World cup dey ekta part hubo. Schedule padla podli kuria toh khiladi aro fans khan ke itu ek din game laga pinnacle event dey paria tak sobse bhaal experience pawoley ensure kuri asey,” ICC Head of Events, Chris Tetley para kuishey.

World cup laga podli kuria schedule dey India toh Pakistan laga khilaf October 14 dey khiliwoley asey, kuntu ICC para Wednesday dey release kurishey. Ageyaga date toh October 15 thakishey Ahmedabad dey.

Itu karoney, England vs Afghanistan laga game itia toh sunday Delhi dey khiliwo, October 15, Saturday October 14 dey nahoina.

World cup toh October 5 dey 2019 laga champion England aro New Zealand bheej dey shuru hui asey, Ahmedabad laga Narendra Modi Stadium dey, aro itu November 19 dey khotom hui.