2026 te government para delimitation exercise(malab latest population data hisap te voting area laga boundary bodli kuribole thaka) logotey “One Nation, One Election” plan te badha ahi asey. South laga bisi state khan tu etu delimitation exercise para south te Lok Sabha seat komti kuridikina North faley thaka state khan te add kuridibole asey koikina bhoi kurikina etu ke oppose kuriasey. Etu delimitation exercise kuntu toh 2026 para lagu hobole expect kuriasey, etu ke loikina south laga state jaiseki Tamil Nadu, Karnataka, Andhra Pradesh, Kerala aro Telangana para bhoi kuriasey ki judi etu ke khali population laga hisap te ekla conduct kurisey koiley, etu para Parliament te taikhan laga seat komti kuridibo. Etu state khan para sawal kuriasey ki population ke control kuribole laga measures(tarika) tu successfully implement kora nimitey taikhan para parliament te taikhan kiley sajai pabo lagey(parliament laga seat haraikina) aro kuntu state para enaka population control kora laga kadam na-utha state khan kinimitey reward pabo lagey(extra seat paikina). Etu toh late 1960s para loikina 1980s taak population control suru kora ke refer kurikina koiasey. 1971 para loikina 2011 taak, north Indian state jaiseki Bihar, Haryana, Gujarat, Rajasthan, Madhya Pradesh aro Uttar Pradesh laga population tu 150% para uthisey aro South faley population bara tu 100% para nichey thakisey aro pura desh laga average population 121% para ekdam nichey thakisey. Judi Lok Sabha seat laga number tu 543 te fixed asey koiley aro delimitation tu 2026 pichey laga population hisap te kurisey koiley, south India tu 20 opor seat haraidibo nisna asey. Aro etu seat khan tu North India laga state khan ke didibo. Lok Sabha laga seat ke 543 para baraikina 848 kuridisey koilebi, Uttar Pradesh ekla para 60 opor extra seat pabo aro South laga pura state milaikina 40 para komti extra seat pabo. Union Home Minister Amit Shah para etu laga jawab te, tai recently Chennai ja homoitey biswas dilaisey ki south faley laga ekta state bi seat naharabo hoilebi olta pro-rata basis(ekey soman bhak kora hisap te) extra seat pabo. Hoilebi, political party khan para etu seat pro-rata hisap te bhak kuribole thaka tu Lok Sabha te etya seat thaka laga percentage hisap te na population laga number hisap te hobo etu safa para kobole koisey. Taikhan para Lok Sabha seat ke 2056 taak enaka hey rakhibole dibole mon asey taki Uttar Pradesh, Bihar aro Jharkhand nisna state khan ke population control kuribole laga time pabo.
India para delimitation tu 4-bar kurisey, 1952, 1963, 1973 aro 2002 te.
1973 picheyte jitya seat baraidisiley Nagaland logotey komsikom duita Lok Sabha seat thakibo lagisiley, Rajya Sabha ke milaikina. 1971 tak te Nagaland laga population tu 5.16 lakh thakisey. Jitya Arunachal Pradesh tu 1987 te ekta state hosiley etu laga population 3-4 lakh thakisey aro etu ekey homoitey Nagaland laga tu 9-10 lakh thakisey. Next delimitation te Nagaland laga assembly aro parliamentary seat tu 60 assembly seat aro duita Lok Sabha aro Rajya Sabha seat para baribo lagey. 2026 te etu seat freeze kurikina rakha laga homoi khotom huwa picheyte, seat khan nutun para bhak kuribole karney union government para ekta Delimitation Commission banabo.
Delimitation ke loikina North-South majotey behes olaithaka nimitey Modi government laga ‘One Nation, One Election’ plan tu south laga state khan te kinaka agey baribo etu kobole naparikina asey.
Add Comment