New Delhi, March 29: India sobse first desh asey kun para Myanmar ke support aru modod dibole announce kurisey, kotey Friday din te ekta 7.7 magnitude laga bishi dangor earthquake ahikena pura country ke barbad kuridisey. Ittu earthquake tu Myanmar te juwa ekso saal majote aha sobse dangor earthquake ase. Airport, building, bridge aru highway sob barbad kuridisey. Myanmar laga osor te thaka desh, Thailand te bhi building khan bhangikina girisey.
External Affairs Minister para koisey ki India tu ekta ‘first responder’ hoikina Myanmar laga manu khan ke modod kuriasey, kotey earthquake tu enaka homoitey ahisey jitya tatey laga manu khan already civil war nimite dukh paikina thaiki asey kuntu para deah laga economy biya kuridisey aro million opor manu nijor laga ghor para dur hoikina ase.
Etu majotey , Prime Minister Narendra Modi para nijor laga chinta express kurisey manu laga mora aru destruction karone. Tai para koishe ki India para sob possible help dibole ready ase.
Tai para enaka koisey”Myanmar aru Thailand te earthquake huwa pichete, etiya thaka situation karone moi bishi chinta ase. Sob manu laga suraksha aru bhal thakibo karone prathana kuri ase. India para sob possible help dibole ready ase. Ittu karone, moi amikhan laga authorities ke apnikhan logotey khara thakibole koidise aru MEA ke Myanmar aru Thailand sorkar logote contact te thakibole direct kuridise.”
Sorkar para etu pichete ‘Operation Brahma’ launch kurisey modod laga saman khan Myanmar ke supply kuribole nimitey.
Saturday phujur te, ekta Air Force aircraft para 15 tonne laga saman khan bukhikina Myanmar laga Yangon te jaisey. Ittu saman khan majotey tent, sleeping bag, blanket, ready-to-eat khana(logalog khabole para khana), water purifier, solar lamp, generator set aru important dawai khan thakise.
Yangon laga Chief Minister, U Soe Thein ke India laga ambassador Abhay Thakur para etu saman khan handover kurise.
Olop ghonta pichete, duita Indian Navy ship – INS Satpura aru INS Savitri – 40 tonne humanitarian aid(jarurat laga saman khan) loikena Yangon port jabole olaisey. Officials para koishe ki aru duita IAF aircraft relief material loikena Hindon Air Force Station para jabole karone tayari kuri asey.
Relief(jaruri saman laga) supply majotey, India laga rescue aru medical team bhi pathai dise Myanmar te post-earthquake operation karone.
External Affairs Minister S Jaishankar para koishe ki ekta 80-member laga National Disaster Response Force (NDRF) team ke Myanmar laga capital Naypyidaw te search aru rescue operation karone pathaise,. Ittu team advanced concrete cutter, drill machine, martool aru plasma cutting machine loikena kaam kuriase. Taikhan logote 4ta rescue dog bhi ase.
Ekta 118-member Indian Army Field Hospital unit ke bhi Myanmar laga Mandalay te pathai dise, kuntu jaga te sobse bisi destruction hoise.
“Ittu team para Myanmar laga manu khan ke first aid aru emergency medical help dibole modod kuribo,” Minister para koishe.
External Affairs Ministry para koishe ki next 24-48 ghonta tu sobsebi important hobo, kotey India laga team tu bishi kaam kuribo paribo aru actively involve thakibo.
Operation Brahma suru hoithaka majotey, Prime Minister Narendra Modi para Saturday din te Myanmar laga military para chola government laga head Min Aung Hlaing logote kotha kurisey. PM Modi para koishe ki India tu Myanmar logote khara ase, aru destruction ke handle kuribole solid support dibo.
Add Comment