New Delhi, February 01: Opposition party khan para etu Union Budget tu ekta mon-nupungcha laga asey koisey. Khas kurikina utu state khan nimitey kuntu toh ruling NDA laga under te nai.
Government logotey eku nutun idea nai koikina, Congress para koisey ki finance minister Nirmala Sitharaman tu purana rasta te berai asey aro etu para bahar olabole mon nathakikina asey, taikhan laga government(BJP) para 1991 aro 2004 te kora nisna.
Opposition party para koisey ki Budget 2025-26 para etu sikhibole paisey ki BJP tu middle-class aro Bihar te vote dhalibole thaka manu khan ke impress kuribole nimitey taikhan laga tax komaisey.
Etu Budget laga bari te huwa ekta press conference te senior Cngress leader aro poila laga finance minister P Chidambaram para koisey ki etu announcement ke tax diya 3.2 crore middle-class manu aro Bihar laga 7.65 crore voters para welcome kuribo. Holebi, India laga baki rajya aro manu khan nimitey, finance minister logotey thanda kotha laga alava eku thakanai, etu te Prime Minister Narendra Modi para lead kora BJP members khan para tali bajaisey.
TMC MP Abhishek Banerjee para koisey ki etu Budget tea aam manu khan nimitey eku thakanai aro etu Budget tu Bihar te election hobole thaka tu dimag te rakhikina banaisey.
DMK MP Dayanidhi Maran para etu Budget tu ekdam mon-nupungcha laga asey, khas kurikina middle class khan nimitey. Aro Bihar laga election ahithaka nimitey, Bihar karney bisi announcement thakisey, Bihar laga manu khan ke aro ekbar ullu banai asey.
RJD leader Tejashwi Yadav aro Jharkhand ke rule kora JMM para bi etu budget laga khilaf te kotha koisey.
Add Comment