Oxford para bona vaccine tin moina pithor te olabo

October 4, 2020. Oxford University para bonai thaka  vaccine toh tin(3) moina pithor UK te olabo koikena Times para kowa news agency IANS, janai thishe. Etu vaccine toh olaikena desh te manuh sob logot Easter din nahowa agae te paijabo koishe. Aha saal naha agae te approval paboli besas ase. Konuba officials para estimate korishe ke, choi(6) moina pithor te jawan manuh sob tawai pabo. Government sources khan vaccine bona aro thiboli te kam kori ase aro Times logot koishe ke, full programme thakibo bhapana ase hoilebi  bacha khan toh nathakibo aro etu choi(6) moina nohoile komti be lobili pareh koishe. Etu samay, Thursday din, European Medicines Agency (EMA) para koishe ke, tai kam para AstraZeneca aro Oxford University’s potential Covid-19 vaccine laga data toh real-time te lowa soru korishe. Vaccine olabo nemite kam toh jolti koriase. Khobor hesab te, agency para koishe ke, British vaccine toh Covid-19 kelaf te sobse agae te bhal hoikena jaiase koishe. Etu vaccine toh Oxford University aro British-Swedish pharmaceutical firm AstraZeneca para bonai ase koishe, etu oper te Serum Institute of India aro AstraZeneca melikena India te be vaccine toh bonai ase koishe. Desh pura te , 1,600 manuh khan logot trials toh koriboli ase koishe.