Delhi, 23 June : India laga sabse dangor civilian honours, Padma Awards khan, Delhi te Tuesday laga second investiture ceremony te dise. Cinema, music aru theatre duniya laga bishi respected personalities ke Padma Vibhushan, Padma Bhushan aru Padma Shri honours dise. Award receive koribole hadir thaka manu khan majot actor Mammootty, singer Alka Yagnik Padma Bhushan paise, ketiya actor R Madhavan ke Padma Shri dise.
74 saal laga Mammootty Rashtrapati Bhavan te thaka Civil Investiture Ceremony-II te award receive korisey. Prime Minister Narendra Modi aru Union Home Minister Amit Shah bhi ceremony te hadir thakise. Mammootty laga beta aru nijor bhi ekjon famous actor, Dulquer Salmaan, audience majot thaki tai laga baba award receive koria time te claps marina support korisey.
Mammootty Malayalam cinema laga ekjon legend ase, aru 400 pora bisi films te kaam kori ase. Tai tinta National Film Awards jitise. 1989 te Oru Vadakkan Veeragatha aru Mathilukal karone first National Film Award for Best Actor paise. Itu pichete Vidheyan aru Ponthan Mada karone second time etu honour hasil kurise. 1999 te Dr Babasaheb Ambedkar biographical film te B.R. Ambedkar laga role karone third National Film Award for Best Actor jitise.
Eki logot, veteran singer Alka Yagnik ke Padma Bhushan dise. Tai bishi iconic songs gai ase, kuntu majot Choli Ke Peeche, Dil Ne Yeh Kaha Hai Dil Se, Hum Tum, Ghoongat Ki Aad Se, aru Kuch Kuch Hota Hai khan included ase.
R Madhavan bhi Padma Shri receive korina President Droupadi Murmu logot stage te jai thakia time te khub khushi dikhai dise. Tai laga wife Sarita aru beta Vedaant bhi ceremony te hadir thakise. Madhavan award receive koribole stage te jai thakia time te, duijon uthi taike applause dise.
Madhavan Tamil, Telugu aru Hindi language laga bishi films te kaam kori ase. Tai laga latest film Dhurandhar The Revenge ase. Tai director hisab te debut Rocketry: The Nambi Effect logot korisey. Film tu bishi awards aru honours paise, juntu majot National Film Award for Best Feature Film bhi ase.
Padma Awards laga first ceremony May 25 te hoi thakise, kitia 131 jon individuals ke bibhinno fields te honours dise. List te 5 Padma Vibhushan, 13 Padma Bhushan aru 113 Padma Shri awards thakise.
