DIMAPUR, OCTOBER 7 : Ekta bhal aro naam thaka Gandhian, Padma Shri Natwar Thakkar toh Sunday pujutte Apollo Hospital, Guwahati te murijaise. Aro tai mura time te tai 86 sal toh huise. Eneka huikena edia toh tai maiki Padma Shri Lentila Ao, maiki bacha 2 jun aro moda bacha 1 jun hi zindah te ase koise.
Etu murijaa Thakkar toh 1932 sal te junum hua laga ase. Etubi Coastal Dahanu Town te. Etu bejete tai Nagaland te 1955 sal phale pora ahe kena thakise. Etubi tai 23 sal dangor time te. Eneka huikena tai porahi Nagaland Gandhi Ashram koi kena Chuchuyimlang bosti, Mokokchung te ula laga ase koise.
Etu murijaa Thakkar bi Local Youth kan ke alak-alak Vocation Training kan manaidiay ke ekta bhal wala thakise. Aro tai eneka bhal kam kuride kena thaka porahi etu Chuchuyimlang Bosti te 2006 phale ekta Centre kobi National Institute of Electronics aro Information Technology koi kena ula laga ase koise.
Tai bi Padma Shree award toh 1999 sal te baa laga ase. Etubi tai kam kan ekdam bhal te mon de kena ahkete luijabole kura karne Government of India pora diya award. Etu oporte tai bi Indira Gandhi Award toh National Integration laga naam pora 1994 sal te baa laga ase. Kele tai manu-manu majutte ekta morom pora kam julai kena thaka karne.
Tai mura nemite bi Nagaland Governor, Shri PB Acharya, Chief Minister Neiphiu Rio, Leader of Opposition, TR Zeliang, Nagaland Unit BJP Party aro tusera kan pora mondukh laga kotha aro etu murijaa laga bhal kam nemite bhal kotha kan janaise koise.
Add Comment