Pahar para pathor gari te laga nimite barota manu jokom hoishe

BANIHAL/JAMMU: Officials koishe Jammu-Srinagar  Highway te boulder geri kena gera te laga nimite barota manu khan jokom hoishe. Etu bqarota passengers khan majote ekta maiki bhi thakishe. Etu ghatna huwa nimite Wednesday te traffic bera bole para rhukhai dishe. Etu jag ate taaza borop aro baris gerishe koishe.

Officials koishe Tuesday saam te Jammu laga gari toh hillock para boulder gera nimite gari te lagishe. Etu ghatna toh Ramban district laga Moumpassi-Ramsu highway te hoishe. Etu ghatna te maiki ekta bishi serious para jokom hoishe, aro dusra egarota manu khan toh olop jokom lok paishe koishe.

Officials koishe jokom huwa bishi manu khan toh first aid de kena discharge kuri dishe. Hoile bhi ekta serious para jokom huwa maiki toh Jammu laga Government Medical College hospital  te rakhi kena ase. Maiki toh math ate jokom hoishe koishe.

Officials koishe nouta Bihar te thaka manu khan thakishe aro Uttar Pradesh aro Madhya Pradesh para ekta ekta manu thakishe. Tai khan toh Srinagar para Jammu te jai thakishe. Gari toh Anantnag te thaka local manu para cholai thakishe.

Officials khan koishe Tuesday saam te highway te bera gari khan te eku ghatna lok pa nai koishe aro olop samay pichete authorities khan Wednesday din para Srinagar para Jammu laga traffic toh continue kuribole decide kurishe.

Officials koishe hoile bhi traffic toh wapas suru kuribole laga decision toh highway jaga khan te taaza borop aro pani gera nimite gari berabole rukhaishe.

Officials khan aro koishe Kashmir te ja gateway Jawahar Tunnel te taaza borop gera nimite rasta toh bishi pishla (slippery) hoishe. Aro baris huwa nimite jag ate mati gerishe. Aro jaga jaga te dangor pathor khan bhi geri ase. Etu jaga khan te Anokhi fall, battery cheshma aro Panthiyal ae koishe.

Tai khan koishe biya mousom hua nimite rasta safa kuribole laga operation te dikdar paishe. Ek bar mousom toh thik hoi jaile highway laga traffic toh joldi para joldi thik kuribo koishe.

Highway toh 15 din opor para bon hoi kena ase. Tuesday din te Srinagar para Jammu te jabole one-0way traffic panch din nimite khulishe koishe.

Tuesday rati te Jammu and Kashmir laga opor jaga khan toh taaza borop gerishe aro plains te baris hoishe koishe. Met office koishe kali saam tok state pura te baris aro borop geribo koishe.