Pakistan laga Outstanding Issue ke solve koribole ami ready ase: Donald Trump

Islamabad, December 1: Outstanding problems laga solutions olai dibole karone US President-elect Donald Trump pora Pakistan ke modot koribole monn ase koikene janai dikene ase.

Mr. Trump pora election jeetikene thaka karone Pakistan Prime Minister Nawaz Sharif pora congratulate koribole call korikene thaka homoi te Trump pora eitu kotha koikene thakishe.

“Judi apuni khan laga outstanding problems te ami ke address koribole dibole monn ase koile ami ready ase. Eitu mamla ke address koribole ami karone honour ase aru eitu kaam ke ami personally kori dibo. 20^th January te ami pora office join koribole ase aru kitya hoilebi ami ke call koribole monn ase koikene call koribi” Eneka Mr Trump pora Nawaz Sharif ke koikene thakishe.

Eitu telephone conversation te Mr Trump pora Mr Sharif ke tarif (praise) korikene thakishe aru Trump pora prime minister ke joldi lok koribole monn ase koikene thakishe. Eneka Radio Pakistan pora report korikene koise.
Pakistan te ahibi koikene PM Sharif pora Mr Trump ke invite korikene thakishe aru Trump pora koise, eitu country visit korikene manuh khan ke lok koribole toh ami bisi khusi hobo.
Poila te Mr Trump pora koikene thakishe, judi ami elect hoishe koile India aru Pakistan majote ami mediate koribo. Hoillebhi Obama administration nisena US President-elect pora koise, judi duita bi countries pora ami ke koise koile ekla ami mediate koribo.
PM office pora dikene readout thaka toh eneka ase:-

“Prime Minister Muhammad Nawaz Sharif pora President-elect USA Donald Trump ke call korikene congratulate korikene thakishe. President Trump pora koise, Prime Minister Nawaz Sharif apuni laga bisi bhal reputation ase. Apuni toh bisi bhal manuh ase. Apuni pora bisi bhal kaam khan kori ase aru eitu kaam toh sob pora dikhi ase. Apuni ke joldi lok koribole ami asha (hope) kori ase. Apuni ke kotha kora toh ami pora apuni ke poila te pora janikene thaka nisena ase. Ekdum bisi opportunities thakikene apuni laga country toh bisi bhal ase. Pakistanis khan toh ekta sob se intelligent manuh khan majote thaka khan ase. Judi apuni khan laga outstanding problems te ami modot kori dibole monn korikene ase koile ami ready ase. Ami ke kitya hoilebi call koribole monn ase koile call koribi, 20^th January te ami pora office loikene thakibo aru eitu laga agge te bi apuni pora call koribole paribo.”