Philippines: Typhoon Vamco ahishe, 67 morikena ase

Manila: November 15, 2020. Etu saal Philippines te sobse beya cyclone para manuh morai toh 67 hoishe ase aro 12 jun harikena ase, koikena national disaster management agency para Sunday te junai thishe. President Rodrigo Duterte toh northern Tuguegarao province te jaikena Cagayan Valley region toh saboli ase. Etu chaka toh Typhoon Vamco aha nemite paani besi flood hoikena ase. Luzon island, aro capital, metropolitan Manila te besi beya para flood hoikena ase koishe. Cagayan chaka te 22 manuh morishe, southern Luzon provinces te 17 jun, Metro Manila te 8 jun aro tuita alag-alag chaka te 20 jun manuh morikena ase, koikena disaster agency spokesman Mark Timbal para khobor toh janaishe. Tai aro koishe, 21 manuh khan jokom paikena ase. Sunday din, Cagayan laga chaka besi te  rice aro corn ola chaka aro 1.2 million manuh thaka chaka toh paani para pura flood hoikena ase, media para khobor thishe. Flood besi tangor howa nemite aro dam para paani aha te hazar families dhuk te ase, konuba manuh khan toh ghor tina oper te ase bolai jaishe. Floods para Keti beya ghor toh 1.2 billion pesos ($25 million) ase aro etu oper te saman beya kora toh 470 million pesos laga dham ase koikena, Timbal para koishe. 26,000 neshina ghor khan ke beya hoikena ase. Relief aro rescue kam toh jai thakishe aro Magat Dam osor te paani toh besi oper te othiase.  Vamco, 21st cyclone toh etu saal Philippines te ahishe, Wednesday din Luzon para aha ase, etu nemite capital chaka te saal pithor te sobse beya flood hoishe. Etu bechete Super Typhoon Goni, duniyaa te sobse tangor hawa-paani toh southern Luzon provinces te ahishe, etu samai olop din agae te besi manuh morishe