November 5 : Chhattisgarh te November 7 te 20 seat laga first phase voting hobole agey te, Durg koikina ekta jag ate meeting te kotha kuri thaka homoitey Prime Minister Narendra Modi para Congress ke corruption(ghoos kha) laga iljam lagaisey.
PM Modi para Saturday din te tatey koisey ki Congress para gorib manu khan laga halat ke sudharibole dibole mon nai kilemaney etu tu taikhan laga faida laga khilaf te asey. Aro tai para announce kurisey ki Union government para free ration scheme tu aro 5 saal nimitey baraidibo kuntu para 800 million manu ke cover kuri asey.
Chhattisgarh laga Durg seher te ekta public meeting te kotha kora homoitey, Modi para Congress laga opor te etu koikina poisa kha laga iljam lagaisey ki Chhattisgarh laga ruling party(Congress) para sob kaam te 30% commission charge korey.
Narendra Modi para enaka koisey, Covid-19 chuli thaka homoitey gorib manu laga sobsey dangor chinta tu etu thakisey ki taikhan para taikhan laga baccha ke ki khilabo….Etu homoitey tai para kun gorib manu ke bi bhuk lagikina ghumabole nidibo koikina faisla kurisey aro enaka kurikina BJP sarkar para Pradhan Mantri Garib Kalyan Anna Yojana suru kurisey.
Etu scheme tu December moina te khotom hobole asey koikina yaad rakhikina, Modi para koisey, “BJP laga sarkar para next 5 saal nimitey 80 crore gorib manu khan karney free ration scheme ke extend kuridibo.”
Prime Minister Modi para iljam lagaikina koisey ki Congress para gorib manu khan ke ekta “vote bank” nisna treat kurisey aro taikhan ke thogaisey. Tai para koisey ki Congress para desh laga gorib manu khan ke galat tarika para istamal kuri asey aro Congress laga pura khel tu taikhan laga parivar laga bhalayi nimitey khela laga asey. Tai para koisey, “Congress nimitey, gorib manu khan tu khali vote bank nisna hey asey.”Aro koisey ki Congress tu poila para grib manu khan ke taikhan laga agey te bhik mangibole dibole mon thakisey aro etu nimitey taikhna para gorib ke gorib hey thakibole dibole mon asey.
Tai para koisey ki BJP para gorib manu khan laga bhalayi nimitey ekdam patience thakikina aro imandari para kaam kurisey.
Add Comment