New Delhi, October 29 : Prime Minister Narendra Modi para Sunday din tea announce kurisey ki October 31 te Sardar Vallabhbhai Patel laga birth anniversary te pura desh te ‘Mera Yuva Bharat’ koikina youth aro youth laga development nimitey ekta nutun autonomous body launch kuribole asey.
Jawan manu khan para etu platform ke cholaikina desh ke agey barabole nimitey kinaka active kirdar nibhabo paribo etu janaikina Modi para jawan manu khan ke MYBharat.Gov.in. te register kuribole koisey.
Sunday te pura desh ke address kurikina Prime Minister Modi para tai para hodai moina kora mashoor radio show Mann Ki Baat laga 106th episode te koisey ki etu pura desh bhor laga platform ‘Mera Yuva Bharat’ tu Sardar Saheb laga jonom huwa din (31st October) te launch kuribole asey.
PM Modi para koisey, “MYBharat para India laga jawan manu khan ke duniya ke agey baraidiya laga bisi event khan te bhag lobole moka dibo. Etu tu India ke develop kuribole nimitey India laga youth power ke join kuribole nohoilebi milabole laga ekta ekdam alag kosis asey. Mera Yuva Bharat laga website My Bharat bi launch hobole asey.”
Etu mamla tu Union cabinet para dui hapta ageytesarkar para jawan manu khan ke samaj te kiba nutun kuribole aro community khan te leader banabole nimitey taikhan laga majotey leadership skill develop kuribole laga aim kurikina ekta platform banabo. Aro etu bi janaisey ki 15years to 29 years laga majotey thaka youth khan para etu platform laga faida uthabo paribo.
PM Modi para 31 October tu Prime Minister Indira Gandhi laga death anniversary bi aseykoikina yaad kurisey aro tailaga ‘heartfelt tribute’ disey.
Diwali tyohar naga ageyte, PM Modi para ‘Vocal for local’ huwa laga tailaga kotha tu aro wapas dohraisey. Tai para India tu duniya laga sobsey dangor manufacturing(saman khan bana) laga hub hoi asey koikina koisey, “ Hodai nisna, etu baar bi, amikhan laga tyohar te amikhan laga priority tu ‘vical for local’ hobo lagey aro amikhan para ekey logotey milikina Atmanirbhar Bharat laga utu sapna ke pura kuribo.”
Add Comment