New Delhi, 23 February : BAFTA Awards 2026 te India chamkise, Manipuri film Boong history bonaise
BAFTA Awards 2026 te India bisi chamkise, aru Manipuri film Boong Best Children’s and Family Film category te jitise. Etu film India pora eitu category te jitishe bhal ekta agey film hoise. Boong Lakshmipriya Devi laga debut feature film ase.
Monday din Prime Minister Narendra Modi tai nijor X account te post kori film laga makers ke mubarak dise. Tai nijor message te film bonua filmmaker aru artist khan ke bisi tarif dise.
Award ceremony London laga Royal Festival Hall te hoise, juntu te film laga makers — Farhan Akhtar, Ritesh Sidhwani, Lakshmipriya Devi aru Alan McAlex — award receive koribo present ase.
Manipur te set hoise etu film, aru family aru hope laga ekta mon chua kahani dikhaise. Kahani te ekta chota lora Boong laga kotha ase, juntu Gugun Kipgen act korise. Tai nijor family ke phir pora eki logot koribo sapna dekhe. Boong ke tai nijor single mother Mandakini dangor korise, juntu Bala Hijam Ningthoujam portray korise. Nijor best friend logot Boong tai missing baba ke bisaribo journey te jai.
Lakshmipriya Devi direct kora etu film Farhan Akhtar, Vikesh Bhutani, Alan McAlex, Ritesh Sidhwani aru Shujaat Saudagar produce korise. Film te Gugun Kipgen aru Bala Hijam main role te ase.
Boong 2024 Toronto International Film Festival laga Discovery section te premiere hoise. Etu pichete film tu bisi global festival te screen hoise — Warsaw International Film Festival 2024, MAMI Mumbai Film Festival 2024, 55th International Film Festival of India, aru Indian Film Festival of Melbourne 2025.
Add Comment