Andhra Pradesh, 7 January : The Raja Saab team karone khushi khobor ase, kile Andhra Pradesh government Prabhas-starrer film laga ticket price hike karone nod dise. Notun government directive hisab te, itu haafta pora pura Andhra Pradesh te The Raja Saab laga paid premiere aru regular shows duita te ticket price barhai diya hoise.
The Raja Saab laga paid premiere shows Thursday pora shuru hobo, aru special screenings karone ticket price maximum ₹1000 fix kora hoise. Regular shows January 9 pora shuru hobo aru government order hisab te ticket rates bhi revise kora hoise. Single-screen theatres te ticket price ₹150 barhai diya hoise, aru etiya ekta seat laga daam ₹297 hoi jaise.
Andhra Pradesh laga multiplexes te bhi ticket price ₹200 barhi jaise, aru film laga prothom 10 din karone ekta seat laga daam ₹377 set kora hoise. Film laga team ke itu time te ekta din te maximum 5 ta show cholabole permission bhi diya hoise.
Prabhas laga alawa, The Raja Saab te Sanjay Dutt, Zarina Wahab, Malavika Mohanan, Nidhhi Agerwal aru Riddhi Kumar bhi star kori ase. Prabhas film te Raja Saab laga role te ase, ekjon manu jitu tai laga aaita logote iman gahira bhab te bandha ase, jitu character Zarina Wahab portray korise. Trailer hisab te, Prabhas ekta abandoned haveli bhitor te dhuke answers bisaribo, jitu jagah te film laga sobse andhar secrets lukai ase. Kintu itu ghar tai nijor ekta trap hoi jai, jikhane dimag sharir laga khilaf te kaam koribo lage.
Sanjay Dutt laga hypnotist character tu shant kintu bhoyonkor power laga ase. Tai zor use nokori, control aru manipulation logote tai laga duniya te dhuka manu sob ke overpower kore. Boman Irani film te ekta mysterious psychiatrist, hypnotist aru paranormal investigator laga role te ase, jitu supernatural elements logote ekta grounded balance diya ase.
Maruthi direct kora aru People Media Factory laga under TG Vishwa Prasad produce kora The Raja Saab January 9 pora duniya bhar te release hobo. Film tu Hindi, Telugu, Tamil, Kannada aru Malayalam bhasha te release hobo.
Add Comment