Guwahati, March 12 : India laga President Droupadi Murmu tu Assam laga Kaziranga National Park te dui din nimitey hobole thaka Elephant Festival(hathi laga tyohar) tu attend kuribole dui din visit te ahibole asey. Etu hathi laga tyohar tu April 6 aro 7 te hobole asey.
Etu laga mamla te Kaziranga National Park Director Jatindra Sarma para etu laga khobor tu pakka asey koikina confirm kurisey. President Murmu tu ekta jeep aro hathi safari te etu national park laga sundur najara tu sabole aro enjoy kuribole asey.
Sarma para agey barikina koisey ki etu dui din laga tyohar tu Kaziranga laga alag alag jaga te manabole asey. Hoilebi etu tyohar mana laga jaga khan tu uccha level laga meeting kora pichetey he faisla kuribo.
Kaziranga hathi laga tyohar tu etu national park te Asia laga haathi khan ke bachaikina rakhibole modod kuribole hodai saal manai.
Rajya te manu aro hathi khan laga bich te jhamila bari thaka laga dhyan khichibole aro etu nimitey haal bisariboley laga maksat para etu tyohar tu tourism department aro forest department para milikina organize kurisey.
Etu tyohar te 100 para bi bisi pala wala Asia hathi khan matha para loikina theng tak sajai kina dance, football, parade aro race khan nisna alag alag event te bhag loi.
Add Comment