Private sector etu ekta important part ase ekta desh laga economy nimite. Private sector te employment create hoi, investment ahibo, aru notun notun idea aru innovation develop hoi. Kintu Nagaland te, private sector bishi pichete thake ase – kom support pai, kom value diya jai, aru society te bhal nazor te para nasai. Government job te full focus thaka karone, private sector to ektam side te rakha jai. Kile etu hoi ase, aru ki koribo lage etu change koribole, etu kotha bujha bisi important ase.
Sobse dangor problem hoise — government job opor full depend kora. Nagaland te bishi manu khan bacha para he government job ke target kore. Exam dibo, interview dibo aru ekta secure job pabo — etu he dream ase. Business, private job, self-employment — etu sob risky aru kom prestige laga kaam nisena dekha jai. Eman thinking te bisi youth khan entrepreneur banibole interested nahoi. Private initiative, idea, aru innovation sob side te jai.
Dusra dangor problem hoise — infrastructure bhal nai. Nagaland te bishi jagah te road kharap ase, electricity thik nai, network aru internet bhi problem ase. Kunuba business start koribole nimite bhal infrastructure to first class condition te ase. Kintu electricity bar bar jabo, road nai, transport bhal nai – etu karone investor khan bhi Nagaland te business open koribo bhoy lage. Ekta business nimite, jodi basic facility he nai, tate survive koribo kiman possible ase?
Land ownership bhi ekta sensitive aru complicated issue ase. Nagaland te land to mostly community aru clan laga control te thake, individual laga personal land olop ase. Etu custom to tribal rights protect koribo nimite bhal ase, kintu business khulibo time te etu dangor problem hoi jai. Business setup koribole land lease aru buy koribo lagibo – kintu legal rule clear nai, clan laga permission lage, aru ekta manu laga kaam nahoi. Etu karone private investment ahibo to ektam hard hoi jai.
Finance aru loan access bhi dangor hurdle ase. Nagaland te banking system kom develop hoise. Business loan dibo nimite bank khan hesitation dekhai – karon documentation, land papers, guarantee na thake. Idea ase, plan ase – kintu poisa nai. Young entrepreneur khan fund na pai karone nijor idea launch koribo naparibo. Venture capital, angel investor, business mentor – etu sob facility to bishi jagah te nai.
Government policy aru support system bhi private sector nimite bhal develop nahoi. Business start koribole rules to clear nai, procedure to slow ase, aru permission lobo nimite time aru kaam duita khotom hoi jai. Corruption, delay aru interference bhi thake. Etu karone outsider investor bhi Nagaland te business kora dikhi kena bhoi pai.
Skill development aru education sector bhi entrepreneur banai thaka nimite bhal support nai. School college te exam pass koribo, job lobo – etu he sikha di thake. Business skill, trade, aru management knowledge bishi manu te nai. Vocational training centre, business class, startup hub – etu khan lagi ase urgently.
Government job upor depend kori thaka to long-term solution nahoi. Private sector thakile he job create hobo, economy grow koribo, aru Nagaland self-reliant hobo. Etu challenge ase, kintu impossible nahoi. Bhal vision aru public support thakile, Nagaland te private sector bhi develop koribo paribo.
Add Comment