Priyadarshan aro Akshay Kumar tu 14 years picheyte eksath kaam kuribole asey

New Delhi, September 09 : Mashoor director Priyadarshan aro superstar Akshay Kumar ke juwa saal eksath dikhisiley. Aro taikhan duijun laga photo leak huwa para manu khan majotey bisi kotha olaidisey. Sob manu para bi taikhan duijun ke aro ekbar eksath ahibole rukhi thakisey. Akhir kar, taikhan laga intazar khotom hoisey aro 14 years picheyte, taikhan duijun tu ekta horror comedy “Bhoot Bangla” te eksath kaam kuribole asey. Etu film ke Ektaa R Kapoor aro Balaji Telefilms Ltd. laga banner under te produce kuri asey. Etu dangor movie laga announcement tu Akshay Kumar laga 57^th birthday te kurisey. Akshay Kumar para Ganesh Chaturthi laga homoitey ekta motion poster release kurikina sob manu ke asurit kuridisey. Aro tailaga birthday din te ekta dangor announcement plan kora laga hint disey. Priyadarshan aro Akshay Kumar para etya tak laga sobsey bisi khusi pa film majotey kunba film khan banaisey. Taikhan duijun para milikina audience ke “Hera Pheri”, “Garam Masala”, “Bhagam Bhag”, “Bhool Bhu;aiyaa” aro “De Dana Dan” nisna film disey kuntu para audience khan laga dil te ekta khas jaga banaisey. Taikhan duijun laga jori tu mashoor hoisey. Aro taikhan laga film laga dialogue tu hodai din laga zindigi laga ekta hisa hoisey. Taikhan duijun tu aro ekbar eksath ahi asey. Aro etu duijun jori para etu baar cinema te ki anibole asey etu sabole interesting hobole asey. ‘Bhoot Bangla’ tu ekta horror comedy(bhoot laga hoilebi hasai diya) laga film asey kuntu tu 2025 te release hobole asey. Etu film laga shooting tu joldi suru hobole asey.