Punjab te Khalistan Tiger Force laga manuh thurishe

Chandigarh: Khalistan Tiger Force (KTF) laga ek jun manuh ke Tuesday din Punjab laga Moga district para thurishe, olop din akhe te tai laga aro dosura tui(2) jun manuh ke be thurikena ase, koikena police para etu khobor toh janaishe. Kamaljeet Sharma alias Kamal ke toh Moga district, Nathuwala Jadid bosti osor te thurishe koikena janaishe. Etu samai, Kamaljeet Sharma alias Kamal laga hath te 4 pistol aro 10 live gooli paishe, koikena senior police official Dinkar Gupta para official statement te junaishe. May 22 darik te aro police para Lovepreet Singh aro Ram Singh ke thurishe, tai jun oper te heinous crime kora samil ase aro etu oper te manuh morai deya case te samil ase. Etu tin(3) jun manuh toh Canada-based chief Hardeep Singh Nijjar laga kotha hesab te kam kori ase aro etu saal January moina te Dera follower ke morai deya te aro priest ek jun ke gooli para jokom kora te samil ase, koikena police para khobor toh janaishe. Nijjar ke ”designated terrorist” ase koikena Unlawful Activities Prevention Act (UAPA) pithor te central government para junaikena ase koishe. Nijjar laga nam toh Khalistani operatives laga list te samil korikena Chief Minister Amarinder Singh para 2018 saal te tai Canadian Prime Minister Justin Trudeau logot visit kora samai janai thikena ase. Mr Gupta para koishe ke, Nijjar jarikena dosura tin(3) jun KTF co-conspirators/masterminds- Arshdip, Ramandip aro Charanjit toh Canada te lukaina bohi ase aro Punjab Police para tai ke thurikena India te anikena prosecution aro criminal trial koriboli kujus kori ase koishe. Moga senior police official Harmanbir Singh Gill para koishe, preliminary investigations hesab te janishe ke Kamal para kam beya kora nemite tai laga Canada-based associates khan para ”hawala” hoikena poisa beya paikena ase koishe.