Rahul Gandhi laga ‘Bharat Nyay Yatra’ nimitey permission security review picheyte hey dibole

Imphal, January 09 : Manipur laga Chief Minister N Biren Singh para January 9 te Congress laga ‘Bharat Nyay Yatra’ laga mamla te kotha kurisey aro koisey ki Manipur te etya kanoon aro beybosta tu biya asey.

CM N Biren Singh para media ke kotha kuri thaka homoitey koisey, “ Rahul Gandhi laga rally nimitey permission dibole laga faisla te etya bi discussion chuli asey. Alag alag security agency. Etu report khan lagga jaanch kora picheyte ekta pakka faisla lobo.”

Rahul Gandhi para lead kora Congress Party para ekta Bharat Jodo Nyay Yatra kuribole plan kurisey kuntu tu Janauary 14 te Imphal para suru hoikina March 20 te Mumbai te khotom hobole asey. Hoilebi, Manipur laga sarkar para etu 6,500 km laga yatra suru kuribole laga permission tu etya tak bi diyanai. Congress laga  General Secretary K C Venugopal aro Manipur Pradesh Congress Committee president Keisham Meghchandra para Manipur laga Chief Secretary te lok kurisey aro Chief Minister N Biren Singh ke party politics pahorikina shanti chunibole request kurisey aro etu samjhaisey ki etu Yatra laga maksat tu rajneetik kamyabi hasil kuribole nohoikina Manipur laga bhabisya ke thik kuribole nimitey asey.

Etu yatra tu Congress party para national election ahibole ageyte majboot kadam utha laga asey .

Etu 66 din laga lamba journey chola homoitey, Rahul Gandhi para komsikom 6,713 kilometre (4,171 miles maan berabole asey), 14 rajya aro 85 district ke cover kurikina. Etu yatra te Maharashtra pungchibole ageyte Manipur, Nagaland, Assam, Meghalaya, West Bengal, Bihar, Jharkhand, Odisha, Chhattisgarh, Uttar Pradesh, Madhya Pradesh, Rajasthan aro Gujarat ke paar kuribole asey. Etu yatra te 355 Lok Sabha constituency(election hobole thaka jaga) cover kuribole asey. 

Congress party para etu bi janaisey ki etu Bharat Nyaya Yatra tu purapuri theng para bera laga nohobo, hoilebi general election hobole thaka nimitey homoi eman nathaka karney aro party laga olop umar hoija neta khan laga health nimitey adha rata theng para aro lamba rasta  bus para travel kuribole asey. Rahul Gandhi para bi manu khan logotey aro bhal para juribole nimitey olop dur tu theng para berabole asey.