Churu, Novemebr 19 : Sunday (November 19) te, Rajasthan laga Churu district te, police khan ke bukhikina thaka ekta gari tu truck logotey takkar mara picheyte, 6jun police murijaisey aro ekjun police jokhom khaisey. Etu police personnel khan ke Sunday din te Rajasthan laga Churu district laga Jhunjhunu jag ate Prime Minister Narendra Modi laga election rally te VIP security duty kuribole assign kurisiley aro taikhan tu Nagaur jaga para utu jaga fale jai thaksiey.
Etu ghotna tu ekdam phujur andhera thaka homoitey National Highway 58 te hoisey jitya etu police official khan Churu district laga Baghsara busti te pungchibole thakisey. Fog bisi thaka nimitey bhal para dikhibole naparikina taikhan laga gari tu ekta truck logotey amne samne takar marisey .
Mahindra Xylo XUV gari, kuntu te buhikina police khan buhikina jaithakisey etu gari tu chepta hoijaisey. 5jun manu tu jag ate murijaisey aro ekjun tu picheyte hospital te murisey. Jokhom khaikina thaka police officer laga halat tu biya asey.
Etu ghotna te react kurikina, Rajasthan Chief Minister Ashok Gehlot para X (poila te twitter) te mora manu khan nimitey dukh jataisey. Tai para etu accident te jokhom huwa police khan joldi aram pabole nimitey prathana kurisey.
Etu Chief Minsiter para koisey, “ Aji phujur te Churu laga Sujangarh Sadar area para ekta gari accident huwa te police khan murija laga monduk khobor paisey. Amikhan para utu sob police khan laga parivar ke monduk janai asey kun khan etu ghotna te murijaisey. Ami para jokhom kha police tu joldi bhal hoijabole prathana kuri asey.”
Etu accident te murija official khan laga naam tu Ramchandra (56 years laga), Sukhram (38 years laga), Kumbharam (35 years laga), Thanaram (33 years laga), Suresh (51 years) laga aro Mahendra (35 years laga) thakisey. Taikhan sob bi Nagaur district laga Khinvsar police station para thakisey. Aro biya para jokhom khaikina thaka officer laga naam Sukharam Khoja thakisey.
Add Comment