New Delhi: Defence Minister, Rajnath Singh para armed forces personnel aro veterans ke hassle-free health services nemite online medical consultation service kuli thishe koishe. Mr Singh koishe ke, online outpatient platform para remote jaga te aro hospital te load komti koribo nemite quality health services toh tai khan logot thibo. “etu tangor kam toh itya halat samai service personnel khan laga health nemite kora ase,” koikena defence minister para etu serive kula samai virtual event te janai thishe. Chief of Defence Staff Gen Bipin Rawat, Army Chief Gen MM Naravane aro Navy Chief Admiral Karambir Singh, etu event te samil korishe. Coronavirus bemar laga kotha kora samai, defence minister para koishe ke, second wave te ke hobo kuboli naparia ekla nahoikena first wave logot be besi kara wala ase janaishe. SeHAT-OPD Portal kula para Armed Forces khan ke tele-medicine services thibo. Tai para aro koishe ke, armed forces khan para desh te bemari logot larai kora te besi tangor motob kori ase. Tai aro janaishe, central government para halat toh hotai sai ase aro etu oper te tawai supply, medical oxygen aro dosura saman nemite high-level committees aro ministers group logot melikena kam korikena jai ase. Defence minister, Rajnath Singh para aro Institute of Nuclear Medicine & Allied Sciences (INMAS) para bonai thaka tawai anti-COVID oral drug 2-deoxy-D-glucose (2-DG) nemite te be kotha koishe. Etu DRDO te sobse tangor laboratory ase aro Dr Reddy”s Laboratories (DRL), Hyderabad logot melikena kam kori ase. Etu tawai toh besi bhal khobor paikena ase, tai para aro janaishe. Drugs Controller General of India (DGCI) para etu moina olop din akhe te emergency samai coronavirus bemari khan logot elaj koriboli manikena ase. “ami besi kushi ase ke aji, tawai toh 10,000 sachets neshina market te ahi ase,” Mr Singh para janaishe. Etu tawai toh powder te ase aro paani te thalile beche paani hoi jai koishe.
Rajnath: Armed Forces nemite Online OPD portal kulishe
