Mumbai, February 19: Rakesh Roshan, kun bisi saal para film khan produce kurikina ahi asey, tai para recently zamana kinaka change hoijaisey etu laga bari te koisey. Etu producer, kun ‘Karan Arjun’, ‘Koi…Mil Gaya’ aro ‘Krrish’ nisna film khan direct kurisey, tai para ajikali zamana kinaka alag hoijaisey aro khorcha bi kinaka barijaisey etu laga bari te kotha koisey.
Tai para enaka koisey, “Utu homoitey amikhan laga studio khan para makeup rooms tu amikhan laga level hisap te rakhi thakanai. Utu homoitey make-up room khan tu bisi bhal thakisey. Hoilebi utu homoitey amikhan main actor khan nimitey vanity vans(ekta gari kuntu bhitor te actor khan aram kuribole, makeup kuribole aro film shoot kuribole nijor laga personal space thakey) banabole suru kurisey. Etya, make-up room khan improve huwa laga bawajut bi, vanity vans khan eman fashion te asey ki apni para actors, directors, choreographers, stunt directors khan ke bi vanity van dibole lagi asey. Kun khan 24 hours set te thakey taikhan ke bi etya vanity van lagey, kiley najaney.”
Tai para koisey ki poila te enaka thakanai. Tai para enaka koisey, “Jitya ami film khan banai thakisey, utu homoitey bi vanity vans khan thakisey, hoilebi ami nijor laga vanity van kitya bi thakanai. Judi ami bathroom jabole mon thakisey koley, ami kunlaga vanity van te hoilebi jaijai. Hoilebi ami etu nubujey ki jitya apni pura time set te thakey, apni ke vanity van kiley lagey?”
Film ban ate technology chola laga bari te tai enaka koisey, “Amikhan tu sob faley, 100% improve hoisey, nutun camera khan bisi helpful asey, nutun technique, green screen khan para sobkuch asan banaidiye.
Add Comment