New Delhi, August 27 : Ram Charan aro Kiara Advani laga iman intazar thaka film ‘Game Changer’ laga release tu delay hobole laga bari tee man bisi akhwa chuli thakisey. Kunba reports khan para koi thakisey ki etu film laga relase tu 2025 te push kuribo parey. Hoilebi, etu film laga makers khan para etu film ke etu saal laga Christmas homoi te release kuribole aim kuri asey koikina dawa korey te sacchayi asey.
Etu film laga producer para etya chuli thaka Moscow International Film Week te etu news clarify kurisiley.
Etu film laga producer, Dil Raju para koisey, “Etu film laga shoot tu complete hoisey aro amikhan etu film ke etu saal laga Christmas te release kuri asey. Ami tu etu film para hosa te bi Shankar Sir aro Ram Charan laga image ke bodli kuribole expect kuri asey. Etu film tu Indian politics laga mudda ke chui aro samaj logotey jurikina thaka theme ke explore korey. Ami akha kuri asey ki etu film tu audience para khusi pabo aro ekta dangor success hobo.”
Tai para etu film tu ekta “proper commercial(pura puri poisa kamabole laga maksat para bana) film hobole asey.
Shankar laga etu dangor Telugu project tu asol te Dussehra te release hobole thakisey. Etya, etu tu Christmas fale release hobole asey. Aamir Khan para bi tailaga film ‘Sitare Zameen Par’ nimitey etu homoi already book kurikina asey. Etu homoitey release hobole thaka dusra dangor film khan tu Hollywood laga Mufasa: The Lion King aro Varun Dhawan laga Baby John asey.
Add Comment