New Delhi, January 24: Etihas laga kahani opor te bana film Swatantra Veer Savarkar picheyte, actor Randeep Hooda tu nutun action film ‘Matchbox’ nimitey director Sam Hargrave logotey kaam kuribole asey. Etu film te John Cena bi thakibole asey. Etu film tu director Sam Hargrave logotey Randeep Hooda laga second collaboration(eksath kaam kora) hobole asey, taikhan laga superhit Netflix film ‘Extraction’ success huwa picheyte. Etu live-action film, kuntu toh Mattel laga mashoor Matchbox toy vehicle line para inspire hoikina bana asey, etu te Hollywood star Teyonah Parris, Jessica Biel aro Sam Richardson bi dikhibole asey. Etu film laga production tu etya Budapest te chuliasey.
Etu film ke Avengers: Endgame aro Extraction 2 laga director Sam Hargrave para direct kurisey aro David Coggeshall aro Jonathan Tropper para likhisey. Etu ke Skydance laga David Ellison aro Dana Goldberg para Mattel Film laga Don Granger aro Robbie Brenner logotey produce kuriasey.
Hooda para Hargrave logotey aro ekbar kaam kora laga khusi share kurikina enaka koisey, “Sam logotey aro ekbar kaam kuribole excited asey. Amikhan ‘Extraction’ te first time ekey logotey kaam kora homoitey bisi bhal homoi bitaisey. Sam tu bisi bhal kahani aro action ola laga master asey. Etu team ke Budapest te join kuribole khusi asey.”
Randeep Hooda tu aro bisi exciting film kuribole asey. Tai para recently Swatantra Veer Savarkar film ke direct kurisey aro etu film te act bi kurisey. Aro etya tai JAAT film laga shooting kuriasey kuntu ke Copichand Malineni para Sunny Deol logotey direct kuriasey. Etu movie ke Pushpa 2 laga picheyte thaka banners para produce kuriasey.
Add Comment