Los Angeles, February 19: Los Angeles court para rapper ASAP Rocky kunlaga asli naam Rakim Mayers asey, taikey 2021 laga guli mara-mari huwa case te innocent(eku golti nathaka) declare kurisey. Etu case te 3-hapta para chuli thaka court trial tu etya khotom hoijaisey. Court para faisla huna picheyte, Rakim Mayers(ASAP Rocky) laga partner Rihanna para tailaga instagram story te khusi jataisey.
Etu case te hearing chulithaka homoitey, Rocky laga defence team, tailaga partner Rihanna aro family members khan court te mojud thakisey. Jitya court para faisla hunaisey, sob bi khusi manaisey. Rapper Rocky tu fence para jump kurikina tailaga ama aro Rihanna ke hug kurisey. Judi Rocky ke etu case te doshi(golta thaka) paisey koiley, tai 24 years nimitey jail jabole thakisey.
Rihanna para bi etu case te Rocky innocent sabit huwa te khusi jataikina tailaga instagram stories te enaka likhisey, “Mahima tu Isor laga aro khali Isor laga hey asey! Tailaga morom nimitey dhanyabad aro nomrota mehsoos kuri asey!
Los Angeles American rapper Rocky laga opor te November 2021 te ekta Hollywood hotel bahar te tailaga poila laga sathi Terrell Efron ke guli mara laga iljam lagikina thakisey. Ekta report hisap te, Efron para koisey ki Rocky para tailaga matha aro pet te guli marisey. Rocky laga lawyer para court te koisey ki Efron laga jokhom tu bisi chutu thakisey aro Rocky para ekta prop gun(matlab film khan te chola nakli gun) hey cholaisiley. Tai para etu bi koisey ki Efron para Rocky ke etu case te fasabole sajish kurisey. Efron para Rocky laga khilaf te 30 million US dollar laga case file kurisiley. Etya, etu rapper tu etu case te bekasur sabit hoisey.
Add Comment