Raveena Tandon para tailaga naam botnam kuribole ksois kora journalist laga khilaf te case file kurisey

New Delhi, June 14 : Actor Raveena Tandon ke  bhir para dhakka-mukki kora laga darawana experience para tailaga fan khan ke asurit kuridisey. Etu sob tu ekjun social media user kun ekta freelance journalist asey koikina dawa kurisey tai para June 2 te ekta video upload kora picheyte hoisey. Tai para X(poila te twitter) te dawa kurisey ki Raveena tu mudu khaikina nisa laga halat te thakisey aro ekjun senior citizen(bura) ke marisey. Hoilebi, Mumbai police para picheyte etu clarify kurisey ki Raveena laga opor te nisa laga halat te thaka, gari speed para chola aro manu ke mara laga iljam laga tu misa thakisey. Etya enaka khobor olai asey ki Raveena Tandon para etu journalist laga khilaf te defamation(naam biya kuribole kosis kora) laga case file kuribole faisla kurisey. Etu defamation notice tu etu journalist ke June 12 te pathaidisey. Raveena Tandon laga Lawyer Sana Raees Khan, kun taikey represent kuri asey tai para enaka koisey, “Olop din ageyte Raveena ke ekta misa misi iljam te fasabole kosis kurisey kuntu tu CCTV footage te clarify hoisey. Aro etu picheyte etu iljam ke withdraw kuri loisey. Hoilebi, nijor ke journalist asey koikina dawa kora ekjun manu para X te etu ghotna ke loikina galat jankari feilai asey, kuntu tu misa aro manu ke gumrah kora laga asey. Enaka galat khobor feila tu Raveena laga izzat ke kunba anjan karon nimitey biya kuribole laga kosis thakisey. Amikhan para etya etu mamla ke thik kuribole nimitey sob jaruri kanooni kadam uthai asey aro nyay kuribole asey. Amikhan Raveena laga saath asey aro etu galat iljam nimitey taikey nuksaan huwa karney etu ke thik kuribole upai mangi asey.”