RG Medical college hospital hatsa laga khisa

Ekta ekdam asurit kuridiya ghotna te, August 9 laga ekdam phujur fale Kolkata laga RG Kar Medical College Hospital bhitor te ekjun 31 years laga postgraduate medical intern maiki ke bisi bhayanak para gang-rape kurikina moraidisey.  Etu darawana ghotna para doctor, public aro political party khan majotey pura desh te protest olaidisey.West Bengal laga Chief Minister Mamata Banerjee laga opor te kara jaanch chuli asey. Mamata Banerjee tu rajya laga head aro medical and home department laga incharge duita bi huwa nimitey tailaga administration para etu ghotna ke handle kora laga tarika nimitey bisi criticism(public khan laga gusa) jheli asey.  Etu case para Calcutta High Court laga dhyan bi khichisey. Calcutta High Court para rajya ke chola laga tarika laga opor te bi serious sawal uthaisey. Etu ghotna te rape huwa maiki tu 36 ghonta kaam kuri thakisey aro hospital laga seminar hall te aram kuri thaka homoitey tai logotey enaka hatsa hoisey. Tailaga body tu August 9 laga phujur fale paisey. Aro tailaga ama baba tu RG Kar Hospital laga assistant superintendent laga taraf para duita urgent call paisey. First te, etu maiki laga ama baba ke enaka inform kurisiley ki taikhan laga chukri tu bimar hoijaisey. Hoilebi, taikhan hospital te pungcha homoitey, police officer para koisey ki tai para suicide kuriloisey. Aro ama baba ke logalog taikhan laga chukri laga deadbody sabole diyanai. Taikhan tu deadbody  sabole nimitey 3(tin) ghonta tak rukhibole majbur kurisey. Jitya taikhan para akhir kar chukri laga deadbody dikhisey, tailaga gao te eman bisi jokhom  aro  gao laga nichey hisa cover nukurikina thaka aro  theng tu darawana para 90-degree angle te thaka dikhikina bhoi khaijaisey. Aro etu nimitey etu chukri laga ama baba tu hospital para taikhan laga chukri suicide kurisey koikina kuwa te doubt kurisey. Taikhan laga dukh ke aro baraidikina, ekjun senior police officer para ama baba ke etu mamla ke agey loi najabole warning disey aro koisey ki etu mamla te musibat khara kuribole eku kaam nai aro deadbody laga  antim sanskar joldi-joldi kuribole nimitey poisa offer kurisey. RG Kar Medical College Hospital laga principal Sandeep Ghosh para etu ghotna ke suicide laga mamla asey koikina frame kuribole kosis kurisey Ghosh tu kanoon para mana kora laga bawajut etu ghotna laga shikar huwa maiki laga naam public te bar bar loithaka nimitey bi criticism face kurisey. Hoilebi etu kanoon bhanga nimitey police para tailaga khilaf te FIR file koranai. Sandeep Ghosh laga past(jaija homoi laga kahani) tu corruption(poisa kha), galat beybohar kora aro kaam kora laga mohol biya bana laga iljam  para bhorta asey. Tailaga khilaf te bisi complaint kora bawajut eku action luwanai. Aro etu tu rajya laga ruling party Trinamool Congress(TMC) logotey tailaga connection thaka nimitey hobo parey. Media report para enaka suggest kuri asey ki etu hatsa laga sikar huwa chukri para hospital bhitor te chuli thaka kunba kaam khan dikhikina etu laga khilaf tea was uthaisey parey kuntu nimitey tailaga jaan jaisey. CBI para etu case te jaanch kora suru huwa picheyte, online te etu chukri laga body pa department te shaak kuribole laga renovation kaam chuli thaka laga photo olaisey. Etu ghotna huwa jaga laga thik osor te thaka ekta room aro etu laga next te thaka maiki khan laga restroom ke ekta nutun rest area banabole nimitey bhangaidisey. Etu para hospital laga etu harkat laga opor te sawal khara kuridi asey. August 15 te, doctor khan para nyay demand kurikina ekta vigil rakha homoitey gunda khan laga ekta jhund para taikhan ke hamla kurisey aro police tu etu jaga para polaijaisey. Etu ghotna opor te public khan gusa uthikina thaka para Mamata Banerjee opor te bisi dangor pressure dhalikina asey. Aro tai para gunda khan ke tailaga administration para bahar nefeka tak, nijor bahar fela khabole laga risk te asey.