Sports

Rifle shooter Ramita para quality field te high score kurishey

January 30, 2025
3 Views

Dehradun, 30 January : Paris Olympics finalist Ramita Jindal ekta dangor statement di dise, tai 10m air rifle qualification te top kuri dise 634.9 score loi kina—juntu Korea laga Ban Hyojin laga world record score 634.5 pora bhal ase—38th National Games te.

Official world record hisab te itu count nokoribo, kintu Paris Olympics te seventh place te thaka Ramita Thursday laga final te bhal performance dibole try kuribo. Olympian Elavenil Valarivan aru World Cup medallist Shreya Agarwal bhi final te punchai dise. Maharana Pratap Sports College laga naya shooting range te women’s 10m air rifle qualification te intense competition aru high scores dikhibo paise. Itu laga ekta example ase ki 45 shooters majote top-8 te ahibo paribo nimite bhi high score lagise—Manyata Singh juntu 630.1 score mari kinai qualify kurise. Ramita ke milaikina, Arya Borse (634.5) Maharashtra pora aru Nithin Narmada Raju (634.4) Tamil Nadu pora bhi dangor score mari dise.

Rapid fire pistol te Vijayveer Sidhu 587 score mari kina qualification field te top kurise. Vijayveer ke challenge dibole India laga best shooters—Bhavesh Sekhwat, Anish Bhanwala, Neeraj Kumar, Gurpreet Singh aru Omkar Singh—sob final te punchai dise.

Host state Uttarakhand nimite first medal wushu pora ahi dise. Uttarakhand laga Jyoti Verma bronze medal jitikina host khan ke khushi di dise, Taolu singles competition te. Itu event te Manipur laga Tongbram Saya Chanu aru Panthoi Devi gold aru silver jitise. Jyoti, juntu Uttarakhand police te kaam kurikina thake, recent te senior national championships te gold jitise.

Swimming te Karnataka first day te dominating performance di kina 5ta gold medal jitise. Dhinidhi Desinghu, promising star ase aru tai 200m freestyle te nija laga timing 2:03.24 te Games record todikina gold jitise. Tai laga second gold 100m butterfly te ahi dise, juntu tai 1:03.62 te complete kurise.

Men’s 200m freestyle te Srihari Nataraj gold jitise, tai laga timing 1:50.57 ase. Tai laga pichete Aneesh S Gowda (1:52.42) aru Kerala laga Sajan Prakash (1:53.73) second aru third place te ahise. Karnataka laga men’s aru women’s 4x100m freestyle relay teams bhi podium te thakise.