Riteish Deshmukh para maney ki ekta movie tu actor laga fee para dabikina thakibo nalagey

New Delhi, July 07 : Riteish Deshmukh tu ajiklai tailaga first OTT show ‘Pill’ laga release nimitey tayari kuri asey. Etu JioCinema series te Riteish Deshmukh ke ekta medical officer laga jag ate dikhibole asey. Etu film tu July 12 te premiere hobole asey. Etu film laga promotion kora homoitey, Riteish para Press Trust of India( PTI ) ke actor laga fee uthi thaka laga bari te kotha koisey kuntu para film laga opor te bojh dhaley. Aro ekta producer hoikina, Riteish Deshmukh para etu reveal kurisey ki jitya tai ekta producer hoikina nijor ke cast korey, tai eku poisa charge nokorey. Ritiesh para enaka koisey, “Amikey eney enaka lagey ki apni para actor laga fees logotey eku film laga opor te bojh nadhalibo lagey. Kilemaney film tu chulibo lagibo. Aro film chulisey koiley, sob manu bi survive kuribo.” Pill laga director Rajkumar Guota aro producer Ronnie Screwvala kun khan bi Riteish logotey etu film te thakisey taikhan para etu mamla te taikhan laga bhabna bi share kurisey. Aamir aro Raid nisna film nimitey jana ja actor Gupta para koisey, “Ekta industry te, amikhan sob bi dusra level te jabole nimitey eksath ahibole lagey. Amikhan para ekta enaka budget te film banabo lagey kuntu sob manu nimitey kaam kuribo.” Riteish laga Pill film te dawai bana laga pharmaceutical duniya laga bhayanak hakikat ke dikhabole aim kurisey.