Road construction project ke loikina jhamila

Foothill road project teke loikina kotha mila-mili nohoilebi jhamila ola picheyte, ekta yaad rakhibole  aro etihasik event hobole thaka tu etya biya hoijaisey. Aro enaka huwa laga reason tu etu jhamila te shamil thaka manu khan hey janey. Etu dangor foot hill road project laga suruwat tu 1974 te hoisey jitya North Easyern Council (NEC) para Dimapur ke Tizit logotey 5ta district laga through para link kuribole nimitey ekta 256 kilometer laga rasta banabole nimitey poisa dibole approve kurisey. Mondukh laga kotha tu, etu rasta banabole laga project tu Assam government laga side para objection aha nimitey bon hoijaisey, kun para etu claim kurisey ki etu rasta laga kunba hisa tu Assam laga territory ke bi chubo. Etu political behes para etu project ke rokhaidikina etu ke agey baribole diyanai. 2012 te hey kunba tribe leaders khan para etu rokhaikina rakha road project ke Foot Hill Road Co-Ordination Committee (FHRCC) laga banner under te wapas suru kuribole decide kurisey. Etu nimitey FHRCC ke dhanyabad dibo lagey kuntu laga naam tu etya Nagaland Foothill Road Co-Ordination Committee (NFHRCC) hoijaisey, etu project ke wapas suru kuribole nimitey. Etu banabole plan kurithaka highway laga maksat tu gari para aha-juwa kora laga homoi aro Dimapur aro Mokokchung, Longleng, Tuensang, Wokha, Zunheboto aro Kiphire nisna district khan majotey distance(duri) komaidibole laga asey. Etu important rasta para resource bisi thaka area khan logotey connect kurikina rajya laga economy barabole modod kuribo. First te ekta 256-kilometre laga rasta banabole plan kora tu etya 395 kilometre kuridisey. Etu toh original bluepint para 139 kilometre bisi asey. Aha-juwa kora laga netwok improve hoijaisey koiley Nagaland laga alag alag district te thaka oil, natural gas, koila, limestone aro chromite laga reserves khan ke bukhikina ekta jaga para dusra jaga loijabole bisi bhal obo. NFHRCC para etu rasta banabole nimitey fund(poisa) pa laga main kaam tu already kuriloisey jitya etu para state governor ke etu dangor project laga bari te janabole nimitey first lok kurisiley. State governor para Nagaland laga Rajya Sabha MP Phangnon logotey milikina Ministry of Road Transport Highways (MoRTH) ke letter likhisey. MoRTH para etu project approve kurikina Special Assistance to State for Capital Investment(SASCI) under te funds disey. December 14,2024 te PWD (R&B) department para 14 firm ke SASCI under te 1^st Phase te Rs 148.5 Crore laga 17 work orders issue kurisey. Hoilebi, etu road project para NFHRCC logotey pre-work agreement sign kora te problem hoikina first musibat face kurisey. NFHRCC  para enaka koisey ki etu committee te etu project nimitey maati donate kora sob tribe(jaati) shamil thaka nimitey aro utu tribe khan bi kunlaga district te etu project cover koranai aro Naga political groups para tax collect nukuribole laga decision luwa nimitey, etu project tu extraordinary asey koikina mani asey. Etu hisap te, NFHRCC para koisey ki sob contractor khan para NHFRCC logotey ekta agreement sign kuribo lagibo taki etu rasta laga construction tu highest standard para aro thik homoitey hobo paribo. Etu agreement etya tak sign nukurikina thaka 7ta firm logotey etya discussion chuliasey, hoilebi duita firm para sign kuribole mana kuridisey. Etu mamla tu titya dangor hoijaisey jitya NFHRCC para koisey ki February 21 te duita firm para PWD(W&H) logotey kotha nukurikina aro NFHRCC ke inform nukurikina MLA laga chairmanship under te etu rasta laga construction suru kuridisey. Etu road construction laga jhamila tu dorkar nathaka aro dukh laga kotha asey. Etu para, galat fremi aro tension olaidisey, kuntu para jhagra olabo parey. Bhal para discussion kora para etu jhamila ke rokhabole parithakisey.